Hospitál Nasionál Guido Valadares (HNGV). Imajen TATOLI/Egas Cristovao

DILI,16 novembru 2020 (TATOLI)—Prezidente junta médika Ospitál Nasionál Guido Valadares (HNGV sígla portugés), Mateus Pinheiro informa, durante fulan agostu to’o agora pasiente ne’ebé hetan ona aprovasaun husi junta médiku hodi transfere ba halo tratamentu saúde iha rai-liur.

”Ita transfere pasiente ba rai liur tanba ita laiha diagnóstika. Ita transfere atu nune’e bele halo tratamentu saúde  tuir kritéria junta médika,” Mateus Pinheiro hateten ba jornalista sira iha HNGV, ohin.

Notísia Relevante:MS Aloka Osan Millaun Hitu Transfere Moras ba Rai-Liur Kada Tinan

Pasiente hirak ne’e maioria sofre moras kankru susun,  kankru tiroid, kankru kolorektál,  kardiaku, kankru serviks,  kankru aten,  no mós kankru ran nian.

“Ita transfere ba rai liur atu halo dignóstika iha ne’ebá, depois kontinua tratamentu ezemplu halo kemoterapia no radioterapia, no mós sira ne’ebé moras fuan ita haruka tau kadeli,” Prezidente Junta Médiku ne’e esplika.

Nia esplika HNGV iha rekursu umanu, maibé laiha ekipamentu atu atende pasiente ho moras kroníku tanba ne’e maka obrigadu tenki halo transferénsia ba ospitál Indonézia, Malázia no Singapura.

Durante pandemia globál afeta tebtebes ba prosesu transferénsia moras sira ba estranjeiru tanba laiha aviaun.

”Ami hasoru problema mak transporte tanba bainhira aviaun laiha ita labele halo transferénsia no tenki hein  aviaun. Enkuantu, pasiente ne’ebé mak ba Malázia no Singapura sa’e tuir aviaun WFP nian, ne’ebé mak semana rua mai dala ida, no ba Indonézia tenki sae travel ba tun iha Atambua mak foin sa’e aviaun  ba Jakarta,” nia hateten.

Notísia Relevante:Durante EE, MS transfere pasiente 11 ba rai-liur

Jornalista:Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here