Diretóra Jerál Prestasaun Saúde, Odete Viegas da Silva.Imajen.Imajen/Antonio Goncalves

DILI, 03 juñu 2020 (TATOLI)-Governu liuhosi Ministériu Saúde kada tinan tenki aloka orsamentu millaun hitu hodi halo tranferénsia ba pasiente timoroan sira hodi halo tratamentu saúde iha rai-liur.

Diretóra Jerál Prestasaun Saúde, Odete Viegas da Silva, hateten pasiente hirak ne’e obrigadu tenke tranfere ba halo tratamentu iha rai-liur tanba sofre moras króniku hanesan kankru, tumor, kurasaun, fase raan no seluk tan.

Nia hatutan pasiente ho moras hirak ne’e mak sempre haruka ba rai li’ur tanba ne’e, Governu liuhosi Ministériu Saúde iha ona hanoin hodi investe Ospitál Nasionál, Referál, sentru saúde no postu saúde sira.

“Ministériu Saúde haree ona no tenki investe iha rai-laran liliu Ospitál sira, Sentru Saúde sira no oinsá mak atu haforsa rekursu sira ne’ebé ita iha,”dehan Odete Viegas da Silva ba jornalista sira, iha Vila-Verde, kuarta ne’e.

Tur dadus husi Ministériu Saúde nian katak oras ne’e daudaun iha pasiente Timoran hamutuk na’in 43 maka sei halo tratamentu saúde iha estranjeiru, Ospitál Singapura iha pasiente fase ran na’in ida, no Ospitál Sangla Bali Indonézia hamutuk ema na’in 42 ho moras kankru, fuan, no tumor.

Atu hamenus gastu orsamentu estadu ba tranferensia moras iha rai-liur maka Ministériu Saúde investe daudaun orsamentu ba rekursu umanu no ekipamentu hodi dezenvolve Ospitál Nasionál Guido Valadares (HNGV-sigla portugés).

”Iha ne’e ha’u atu hato’o informasaun ba públiku katak ema ne’ebé mak fase ran iha rai li’ur mak ida de’it kuaze hotu hotu konsentra hotu ona iha Ospitál Nasionál Guido Valadares hamutuk 92 mak daudaun ne’e fase ran hela iha ne’e,” nia esklarese liután.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here