Sekretáriu Estadu Juventude no Desportu, Abrão Saldanha. Imajen SEJD/Dok.

DILI, 13 novembru 2020 (TATOLI)—Sekretáriu Estadu Juventude no Desportu (SEJD) Abrão Saldanha, hateten nia parte planea iha 2021 sei kria formasaun emprendedorizmu ba joven Timoroan sira nune’e bele kria servisu ba an rasik.

“Ami estimula hela inistiativa joven sira nian hodi nune’e tinan oin mai bele lori fali joven sira atu deside área produtivu saida mak sira prontu atu integra ba maibé la signifika SEJD mak sei fo empregu ba sira,” informa nia ba Tatoli iha ninia servisu fatin, ohin.

Notísia Relevante :SEJD Foun Sei Dezenvolve Talentu Joven Sira

Formasaun emprendedorizmu ne’e tuir planu sei hala’o iha Munisípiu 12 inklui Rejiaun Administrativa Espesiál Oe-Cusse Ambeno (RAEOA).

Nia dehan asuntu joven ne’e transversal no la’ós responsabilidade SEJD nian mesak tanba ne’e, SEJD sei kria ekipa inter-ministeriál ida hodi prepara planu asaun nasionál ba joven sira iha Timor-Leste.

SEJD ninia programa definitivu ne’ebé maka implementa ona durante ne’e hanesan edukasaun sivíka, patriótika inklui kompeténsia vida ne’ebé benefisia ona joven hamutuk rihun 16.

“SEJD nian ba 2021 mós sei monta unidade prestasaun servisu iha nivel postu administrativu 52 inklui sira iha sentru urbana 65. Sira ne’e mak sei servisu hamutuk ho estrutura suku sira liliu ho reprezenta joven na’in rua iha kada aldeia ne’e atu dinamiza no organiza partisipasaun joven sira nian iha dezenvolvimentu ne’e rasik,”tenik Abrão.

Ho planu asaun ba joven sira ne’e sei reforsa tan iha área turizmu, agrikultura, indústria, komérsiu, siénsia no teknolojia.

“Ami halibur malu ona iha SEJD entre ekipa ministeriál sira parese semana oin ita bele realiza ona pose ba membru sira atu nune’e ita bele hahú ona servisu ba planu integradu no transversál ba joven sira,” nia hateten.

Daudaun ne’e, Governu liuhosi SEJD esforsu hela atu harii Konsellu Nasionál Dezenvolvimentu Juventude, no konsellu ne’e orgaun konsultivu Primeiru-Ministru nian hodi define prioridade Governu nian ba joven sira.

Nia dehan panu asaun nasionál ba joven ne’ebé maka ekipa inter-ministeriál atu kria sei reforsa liután Polítika Nasionál Joventude ne’ebé maka aprova ona iha 2016 hodi konsentra ba edukasaun, joven empregu, joven sivíku, joven ho krime no seluk tan.

Notísia Relevante :SEJD Sei Estabelese Institutu Nasionál Desportu

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here