DILI, 20 fevereiru 2020 (TATOLI)–Sekretáriu Estadu Juventude no Desportu (SEJD) iha ona planu sei estabelese Institutu Nasionál Desportu hodi kapasita timoroan sira iha área edukasaun fízika no desportu iha futuru.
Diretór Nasionál ba Desportu Alta Kompetisaun, João Rodrigues, hateten antes estabelese Institutu Nasionál Desportu, SEJD sei halo uluk identifikasaun ba númeru profesór hira maka dadaun ne’e hanorin hela iha área edukasaun fízika no desportu iha territóriu Timor-Leste para reforsa implementasaun polítika SEJD ba estabelesimentu IND.
“Ha’u halo ona kontaktu ho profesór balun ne’ebé ha’u hatene hodi hetan mós lista husi profesór sira seluk ne’ebé iha koñesimentu ba área edukasaun fízika no desportu”, dehan Diretór Nasionál, João Rodrigues ba TATOLI iha ninia servisu fatin, SEJD, kinta ne’e.
Nia tenik, hosi identifikasaun ne’e atu ajuda Governu liuliu SEJD hodi hatene loloos totál númeru profesór edukasaun fízika no desportu na’in hira maka daudaun ne’e ramata ona Estudu nivél baxarelatu, lisensiatura, mestradu ho doutoramentu hodi dezenvolve di’ak liután sira-nia grau edukasaun.
“Kuandu IND ne’e establese ona tuir polítika ne’ebé iha, posiblidade sistema akadémiku ne’ebé tenke reforsa uluk tuir nivél mak Baxarelatu. Depois kuandu buat hotu la’o di’ak ona mak sei hakat ba lisensiatura,” nia esklarese.
Jornalista : Tomé Amado
Editór : Agapito dos Santos
