Sekretáriu Estadu Juventude no Desportu, Abrão Saldanha. Imajen/Espesiál

DILI,23 juñu 2020 (TATOLI)-Sekretáriu Estadu Juventude no Desportu foun, Abrão Saldanha, hateten durante ninia mandatu tinan tolu sei dezenvolve talentu foinsa’e sira iha área desportu iha Timor-Leste.

“Iha área juventude tenke muda imajen ida ne’e, oinsá dezenvolve joven sira sai ativu liu, sai kreativu liu hodi fó espasu ba sira no hatuur sira nia an,”dehan Nia ba TATOLI, via telefone tersa ne’e.

Aleinde ne’e sei hatutan mós programa balun ne’ebé maka Eis Sekretáriu Estadu Juventude no Desportu (SEJD), Nélio Isaac Sarmento, implementa ona antes ne’e hanesan desportu komunitáriu, desportu prestasaun, desportu eskolár no seluk tan.

“Pratikamente saida mak dadauk ne’e ha’u simu mandatu sorin de’it, ne’ebé halo tia ona, entaun saida mak iha nanis ona ha’u sei kontinua ho ida ne’e,” tenik Abrão.

Nune’e sei konsentra  mós ba problema arte marsiál ne’ebé ohin loron sai preokupasaun públiku liliu sodiedade no joven sira.

“Ha’u nia ideia importante liu mak desportu hanesan prátika ida ne’ebé ba ema hotu foin mak bele hetan nia prestasaun hodi prepara baze ba desportu,ida ne’e mak ideia provizóriu ne’ebé ha’u sei ko’alia ho funsionáriu sira,”hateten Governante.

Tuir planu Membru Governu foun ne’e sei simu pose husi Prezidente Repúblika, Francisco Guterres Lú Olo, iha kuarta (24/06), iha Palasiu Prezidensiál Bairo-Pité Dili.

 Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here