Lansamentu relatóriu finál sensu agríkola 2019 iha salaun MF, Dili, tersa (10/11). Imajen TATOLI/António Gonçalves

DIILI, 10  novembru 2020 (TATOLI)—Governu liuhosi Ministériu Finansa (MF) no Ministériu Agrikultura no Peska (MAP) lansa relatóriu finál sensu agríkola 2019, ne’ebé hatudu maioria uma-kain halo atividade agrikultura no propriedade agríkola okupa estensaun ektare 219.250.

Ministra Finansas ein ezersísiu, Sara Lobo Brites hateten rezultadu sensu ne’e iha kestaun haat importante ne’ebé ezekutivu sira presiza tau prioridade bainhira foti desizaun.

“Sensu agríkola importante tebes mai Timor-Leste tanba bele permite Governu no entidade tomak, dahuluk bele hatene loloos kona-ba estrutura kada uma-kain agrikultór no padraun moris  agrikutór iha área rurál,” informa atuál Vise-Ministra Finansa liuhosi ninia diskursu iha seremónia lansamentu relatóriu finál, iha salaun MF, Aitarak-laran, tersa ne’e.

Notísia Relevante: Relatóriu Sensu Agríkola: Porsentu 66 Uma-Kain iha Timor-Leste Halo Atividade Agrikultura

Sensu agríkola 2019: propriedade agríkola família boot liu maka Bobonaro

Daruak, liuhosi sensu ne’e bele hatene kona-ba agrikultura ne’ebé nu’udár setór prinsipál ba dezenvolvimentu ekonómiku Timor-Leste.

Vise-Ministra Finansa, Sara Lobo Brites. Imajen TATOLI/António Gonçalves

Kestaun datoluk ne’ebé importante maka ezekutivu sira bele hadi’a polítika no planeamentu dezenvolvimentu agrikutura bazeia ba dadus no informasaun ne’ebé  maka atualizadu, nune’e bele hasa’e produsaun agrikultura, pekuária no peska.

Ikus liu maka dezenvolve setór agrikultura hodi kotribui ba dezenvolvimentu  rurál, diverifikasaun ekonómika, kriasaun kampu serbisu hodi bele hasa’e rendimentu agrikultór no sei kotribui ba hamenus kiak iha rai-laran.

“Governu kontinua komprometidu promove polítika bazea ba evidénsia, nune’e dadus hosi sensu agríkola ne’e sei kompleta dadus sensu uma-kain foun, ne’ebé sei realiza 2021 no dadus hosi Timor-Leste sub of living standard ne’ebé planu atu hala’o iha 2022,” nia akresenta.

Partisipante sira iha lansamentu rezultadu finál sensu agríkola 2019 iha salaun MF, Dili, tersa (10/11). Imajen TATOLI/António Gonçalves

Aleinde ne’e, daudus sira sei permite atu hatene loloos komponente sira iha kamada sosiál atu halo analiza no hatene buat barak, inklui kona-ba agrikultura, demografia no padraun moris povu.

Tuir governante ne’e, investimentu ne’ebé maka halo ba peskiza no analiza tenke iha retornu, tanba ne’e presiza utiliza ho di’ak.

“Husu ba entidade tomak públiku no privadu atu uza dadus  hirak ne’e ba interese  prosesu dezenvolvimentu iha Timor-Leste,” nia apela.

Lori Governu nia naran, Vise-Ministra Finansa agradese Sekretariadu Tékniku no ekipa ne’ebé halo levantamentu iha teritoriu laran tomak.

66% korresponde 141.000 hanesan uma-kain agrikultór

Vise-Ministra Finansa, Sara Lobo Brites, relata rezultadu finál sensu agríkola 2019 hatudu katak uma-kain 66% maka hanesan  uma-kain agrikultór, ne’ebé korresponde 141.000 hosi 213.141.

Partisipante sira iha lansamentu rezultadu finál sensu agríkola 2019 iha salaun MF, Dili, tersa (10/11). Imajen TATOLI/António Gonçalves

“Signifika setór agrikultura impotante tebes iha prosesu dezenvolvimentu Timor-Leste tanba maioria uma-kain depende ba setór ne’e. Dadus mós hatudu katak rai hosi uma-kain ne’ebé uza hala’o atividade agrikultura ektare 216.180, enkuantu hosi instituisaun ektare 3.070, informasaun ne’e importante atu hatene kona-ba utilizasaun produsaun agíkola,” nia subliña.

relatóriu mós hatudu, uma-kain agrikultór 15% lidera hosi feto no 85% lidera hosi mane.

“Informasaun ne’e mós importante tanba dezenvolvimentu agrikultura tenke konsidera mós ezistensia partisipasaun feto iha setór ida ne’e,” nia fó hanoin.

Enkuantu, uma-kain agrikultór 62% maka hakiak animál boot hanesan karau no kuda, 92% maka hakiak animál kiik hanesan fahi no bibi, no 82% maka hakiak manu.

“Dadus sira-ne’e permite ita atu hatene iha sub-setór pekuária ne’ebé importante atu kontribui atu hadi’a nutrisaun povu nian, hatama rendimentu ba hakiak na’in sira no iha poténsia ba subtituisaun importasaun no promove esportasaun iha futuru,” Sara Lobo hatutan.

Uma-kain agrikultór 28,2% maka la eskola, 27,6% iha nível edukasaun primária, 13,5% iha nível pré-sekundária, 15,8% ho nível sekundária, 2,2% ho nível diploma, no 3,9% de’it maka ho nível edukasaun lisensiatura.

Partisipasaun uma-kain iha atividade peska mínimu

Relatóriu sensu agríkola mós fó sai katak 60% uma-kain envolve iha atividade peska no hosi totál ne’e, 25% laiha ekipamentu própriu hanesan ró.

Aleinde ne’e, dadaus sira hatudu katak maski Timor-Leste iha poténsia boot ba setór peska, maibé partisipasaun uma-kain iha setór ida ne’e mínimu no sei nafatin uza forma tradisional.

Maski nune’e, nia dehan rezultadu sensu agríkola ne’ebé maka  fó  sai nu’udár informasaun jerál de’it.

“Husu ba parte interviniente sira, parseiru, entidade públiku no privadu, parseiru dezenvolvimentu sira atu asesu informasaun kompletu iha relatoriu ne’ebé lansa ona liuhosi Diresaun Jerál Estatístika tanba ita halo investimentu boot no han tempu ba sensu agríkola 2019 hodi hetan retornu iha furturu. Governu mós bele halo polítika estratéjia ba programa dezenvovimentu setór agrikultura bazea ba dadus ne’ebe komprensivu, konfiavel no atualizadu,” nia rekomenda.

Ministru Agrikultura no Peska, Pedro Reis. Imajen TATOLI/António Gonçalves

Iha fatin hanesan, Ministru Agrikultura no Peska, Pedro Reis konsidera lansamentu sensu ne’e hatudu susesu boot ba MAP no MF inklui entidade ne’ebé envolve.

“Hanesan Ministru ne’ebé asume kargu iha fulan-tolu liu ba, ha’u fó agradese ba ekipa tékniku sira hotu ne’ebé fó apoiu másimu ba atividade ne’e,” governante ne’e dehan.

Sensu realiza iha postu 65 no suku 452

Nune’e mós, Prezidente Sensu Agríkola 2019 no atuál Diretór Jerál Estatístika MF, Élias dos Santos, husu ba Governu atubele uza rezultadu sensu ne’e halo planu dezenvolvimentu ba bem estar povo.

Prezidente Sensu Agríkola 2019 no atuál Diretór Jerál Estatístika MF, Élias dos Santos. Imajen TATOLI/António Gonçalves

Sensu ne’e hala’o ho maneira questioner no relatoriu finál halo to’o iha nível postu administrativu 65 no suku 452 iha territóriu tomak no relatóriu ne’e hamutuk iha pájina 286.

Biban ne’e, nia parte kongratula VI Governu Konstitusionál, ne’ebé liuhosi rezolusaun ida bele inisia sensu ne’e.

Aleinde ne’e, nia apresia serbisu Ministru Agrikuktura no Peskas sesante, Joaquim José Gusmão dos Reis Martins no atuál Ministru Pedro Reis ne’ebé apoia ein termu polítika hodi atividade bele la’o ho di’ak no hetan susesu to’o lansamentu.

Seremónia ne’e partisipa hosi parseiru dezenvovimentu hanesan WFP, FAO, sosiadade sivíl no entidade balun tan.

Kustu ba sensu agíkola 2019 hamutuk millaun $5 hosi Orsamentu Jerál Estadu no atividade hahú iha 12 agostu 2019.

Pergunta ne’ebé sei uza iha sensu ne’e hamutuk 102, liuliu iha área peska, floresta, rai, no pekuária tantu kiik ka boot.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here