Hare iha Atabae. Imajen Tatoli/António Gonçalves

DILI, 10 juñu 2020 (TATOLI) – Komisaun Tékniku Sensu Agríkola liuhosi Unidade Rekolla dadus ne’ebé halo ona analiza dadus tuir padraun internasionál, aprezenta Relatóriu Sensu Agríkola 2019.

Aprezentasaun iha ámbitu enkontru entre Prezidente Komisaun Tékniku Sensu Agríkola 2019, Elias dos Santos Pereira, hamutuk ho komité tékniku, ne’ebé kompostu husi Diretór Jerál liña ministeriál, no Diretór Agrikultura husi Munisípiu sira.

Governu liuhosi MAP lansa Sensu Agríkola iha loron 13 agostu 2019.

Sensu Agríkola 2019 foin realiza ba dahuluk hafoin Timor-Leste ukun-an nu’udar nasaun soberana ida, maski antes ne’e Governu liuhosi Ministériu Finansa realiza ona sensu uma-kain.

Prezidente Komisaun, Elias dos Santos Pereira, hateten rezultadu husi levantamentu dadus hatudu katak populasaun porsentu 66 iha Timor-Leste maka halo atividade agrukultura.

“Sensu agríkola ho totál uma-kain 213.714 husi populasaun Timor-Leste millaun 1,2. Husi totál uma-kain, porsentu 66 maka hanesan agrikultór ka korrespode ho uma-kain 141.140,” informa Elias dos Santos iha Salahn MAP, Comoro, kuarta ne’e.

Atuál Diretór Estatístika ne’e esplika, haree ba xefe uma-kain entre feto no mane, porsentu 15 maka feto no porsentu 85 maka mane.

“Relatóriu ne’e rasik ami finaliza ona iha marsu 2020 maibé infelizmente ami labele halo enkontru hodi atualiza rezultadu ne’e tanba ita iha situasaun COVID-19, tanba ne’e maka ami foin realiza iha tempu ohin,” dehan Prezidente Komisaun ne’e.

Tuir planu, semana oin sei aprezenta rezultadu Sensu Agríkola ne’e ba Ministru Agrikultura no Peskas, Pedro dos Reis no Ministru Finansa, Fernando Hanjam no sei aprezenta mós ba Konsellu Ministru hodi tempu badak halo ona lansamentu ba sensu ne’e.

“Ohin ami halo aprezentasaun jerál de’it hodi nune’e komité tékniku bele hatene tanba ami servisu hamutuk ho sira hahú husi dezenvolve kestionáriu iha agostu to’o outubru, hafoin prosesa analiza no rezultadu finál to’o lansa,” tenik Prezidente Komisaun.

Nia dehan, bainhira aprezenta dadus ba ministru rua ne’e iha posibilidade fulan-juñu bele lansa.

“Fin juñu ami bele halo lansamentu depende ba Ministru rua no desizaun Konsellu Ministru kuandu aprova ona ita bele lansa ona no ida ne’e ba dahuluk ita halo Sensu Agríkola iha Timor-Leste,” nia akresenta.

Husi komisaun sei prepara sumáriu indikadór importante husi relatóriu ne’ebé kompostu husi indikadór hamutuk 86 no sei prepara infogram uza mapa no persentajen sira, hodi nune’e  fasilita bele fasilita membru governu sira bele komprende di’ak liután.

“Rezultadu husi Sensu Agríkola ne’e MAP sei uza   ba implementasaun programa prioridade balun husi orsamentu 2020 no 2021 ne’ebé tempu badak sei apresenta,” nia subliña.

Iha Fatin hanesan, Sekráriu Ezekutivu Komisaun Organizadora Sensu Agríkola, Claudino Ninas Navais, hateten rezultadu ne’e graduadu husi universitáriu porsentu 2 maka hola parte hodi halo atividade agríkola puru.

“Restu husi porsentu 66 la halo atividade agrikultura no la prese rekezitu, hanesan hakiak karau ida de’it ne’e sira la’ós agrikultór, tanba ne’e la tama kritéria,” nia dehan.

Nia esplika, bainhira ema ida hakiak manu menus sanulu ne’e la’ós hakiak-na’in no sira ne’ebé maka iha to’os no natar menus 2 ne’e la’ós agrikutór.

“Kritériu sira ne’e maka atraza atubele define didi’ak sé maka agrikultór loloos,” nia hateten.

Ekipa tékniku prepara tinan-rua liubá atu define kritéria no tau iha kestionáriu no kaer manuál hodi ba entrevista.

Munisípiu ne’ebé maka númeru barak iha vida agrikultura maka Bobonaro.

“Depende ba ema idaidak ne’ebé maka kuda ne’e ninian totál área kultivu ne’e hira tanba iha munisípiu balun ne’ebé maka ninian área boot maibé kultivasaun ki’ik, hakiak animál barak no mós kestaun la hanesan mosu iha munisípiu seluk sira iha territóriu Timor-Leste,” nia subliña.

Nia parte kongratula populasaun Timor-Leste, liuliu Xefe Aldeia, Xefe Suku, Administradór Postu Administrativu no Administradór Munisípiu sira ne’ebé kontribui hodi halo susesu ba iha sensu ne’e.

Sekretariu Jerál MAP, Cesar da Cruz, felisita Diresaun Estatístika no liña ministeriál sira, tanba maski ho dezafíu maibé konsege akumula dadus sira iha Sensu Agríkola.

“Parabéns ba ita bo’ot sira, ho esfosu hodi akumula dadus ba finalizasaun Sensu Agríkola tanba husi ne’e karik ba oin Ministériu Agrikultura no Peskas sei haree rezultadu relatóriu ne’e hodi tau prioridade balun ba planu asaun Ministériu,” nia dehan.

Programa Sensu Agríkola finansia ho Orsamentu Jerál Estadu (OJE) hamutuk millaun $5.

Pergunta ne’ebé uza iha sensu ne’e hamutuk 102, no pergunta espesífiku iha área peska, floresta, rai, haki’ak animál tantu ki’ik ka boot.

Ema ne’ebé envolve iha ekipa Sensu Agríkola hamutuk 2.584, kompostu husi ema ne’ebé maka ka’er GPS iha 646 hodi sukat natar no to’os, supervizór 646 no entrevistadór iha 1.292.

Sensu Agríkola 2019 lansa husi eis Ministru Agrikultura no Peska, Joaquim José Gusmão dos Reis Martins, no akompaña husi Primeiru-Ministru, Taur Matan Ruak, Ministra Finansa interina, Sara Lobo Brites, Prezidente Komisaun Tékniku Sensu Agríkola 2019, Elias dos Santos Ferreira, no Sekretáriu Estadu Formasaun Profisionál no Empregu, Julião da Silva.

Jornalista: Natalino Costa
Editora: Julia Chatarina

HAKEREK NO HATÁN

Please enter your comment!
Please enter your name here