DILI, 10 novembru 2020 (TATOLI)—Diretór Administrasaun Finansa no Lojístika Ospitál Nasionál Guido Valadares Dili, Duarte Marçal Araújo, informa nia parte propoin ona $11.450.915 ba Orsamentu Jerál Estadu 2021 hodi ezekuta ba saláriu vensimentu, bens servisu no tranferénsia públika.
Saláriu no vensimentu $5.117.740, bens servisu $4.594.326, Kapitál menór rihun $ 238.849, kapitál dezenvolvimentu $1.500.000, inklui orsamentu $1.739.000 ba planu rekuperasaun ekonómika.
Notísia Relevante :HNGV Buka Hadi’a Kondisaun Infraestrutura iha Sala VIP
HNGV iha funsionáriu purvolta 789 mane 339 no feto 459 ne’ebé kategoria ba rejime espesiál, no kargu xefia iha ema na’in 50-resin.
”Bens servisu ne’e kona-ba operasionál ba hahán atu asegura ba ema moras sira no mós ba kontratadu asesór sira inklui cliner no seguransa sira iha HNGV depois iha tranferénsia públika millaun $1.7 ne’e ba kategoria rekuperasaun ekonómika ida ne’e ita atu halo konstrusaun ida mós suporta médiku sira ba eskola inklui ba halo treinamentu hamutuk rihun 1.5,” dehan Duarte Marçal Araújo ba TATOLI iha nia kna’ar fatin HNGV tersa ne’e.
Iha tinan oin HNGV planea konstrui edifísiu sala Verry Important Person ka VIP, Sentrál Oksijéniu inklui hariis fatin iha HNGV tomak.
Nia esplika pakote fiskál 2021 ne’ebé maka simu husi Ministériu Finansa konsidera la sufisiente atu ezekuta iha tinan oin liliu iha item kapitál dezenvolvimentu hodi harii edifísiu foun VIP nian.
Notísia Relevante :HNGV Kobra Reseita Rihun $ 107.456
Jornalista : Felicidade Ximenes
Editór:Agapito dos Santos
