Diretór Administrasaun Finansa no Lojístika, HNGV, Duarte Marçal Araújo. Imajen: Felicidade Ximenes

DILI, 29 maiu 2020 (TATOLI)-Ospitál Nasionál Guido Valadares (HNGV-sigla portugés) durante fulan-lima, hahú janeiru to’o meadu maiu 2020 ne’e rekoilla ona reseita hamutuk osan $ 107.546.

HNGV kobra reseita hirak ne’e maihosi sala atendimentu pasiente Timoroan no sidadaun estranjeiru sira ne’ebé maka baixa iha sala VIP nian no mós osan medikamentu seluk tan.

Diretór Administrasaun Finansa no Lojístika, Duarte Marçal de Araújo, relata reseita ne’ebé maka kobra husi sala VIP hamutuk osan $ 56.923.31 no restu ne’e maihosi forñesimentu medikamentu ba pasiente ema estranjeiru sira ne’ebé maka baixa iha sala VIP.

”Durante fulan-rua abríl ho maiu nia laran ne’e pasiente ne’ebé baixa iha sala VIP ne’e ema saúde sira tanba sira mós moras entaun baixa iha sala VIP, entaun iha serkulár sira ba saúde sira la selu,” dehan nia ba jornalista sira iha HNGV, sesta (29/05/2020).

Nia esplika HNGV iha sala VIP númeru 1 no 2 hodi prepara ba membru Governu, orgaun soberanu no ema estranjeiru ho presu kada kalan ida selu osan $ 50.00, maibé ba sidadaun Timoroan baibain selu $ 35.00.

“Ema estranjeiru selu $ 50 dolar ne’e selu ba kama sira ne’e de’it maibé kona-ba aimoruk sira ne’e selu ketak, ita-nia sidadaun Timoran selu mak kama nee de’it maibé kona-ba aimoruk sira la selu,”nia realsa liután.

Kona-ba kondisaun sala VIP, nia rekomenda presiza atu hadi’a kondisaun liliu hariis fatin, kria fatin fase bikan, konstrusaun varanda sala VIP.

”Ita tenki hadi’a kondisaun ho di’ak no aumenta tan kuartu foun balun hanesan kuartu foun haat hanesan ne’e tan para ita bolu VVIP entaun kuartu ne’e ba ita-nia membru Governu sira depois ita hadi’a hotu ita mós tenki hasa’e nia presu,”katak nia.

Jornalista : Felicidade Ximeenes

Editór       : Agapito dos Santos

HAKEREK NO HATÁN

Please enter your comment!
Please enter your name here