Diretór Administrasaun Finansa no Lojístika, HNGV, Duarte Marçal Araújo. Imajen: Felicidade Ximenes

DILI, 02 marsu 2020 (TATOLI)–Diretór Administrasaun Finansa Lojístika Ospitál Nasionál Guído Valadares (HNGV-sigla portugés), Duarte Marçal de Araújo, hateten daudaun ne’e nia parte buka atu rezolve problema infraestrutura bázika liuliu toilet no AC (Air Conditioner) balun iha sala VIP tanba aat ona.

Maibé, tuir nia, parte buka atu rezolve atu halo manutensaun ba fasilidade ospitál públiku ne’e neineik tanba HNGV funsiona ho de’it orsamentu duodésimu.

”Kama iha VIP iha 40 no haris fatin balun mak aat ona maibé ita hadi’a ida pur ida de’it tanba ita uza duodésimu maibé atu hadi’a hotu ha’u sente la bele,” informa Duarte de Araújo ba jornalista sira iha HNGV, segunda ne’e.

Ospitál nasionál koloka ona tékniku balun hodi halo manutensaun ba AC no hadi’a hariis fatin ne’ebé daudaun ne’e aat ona.

”Kuartu haat ne’e ita loke ba VVIP (Very Very Important Person) no fatin ne’e prepara ba governante sira hodi halo tratamentu,” diretór ne’e klarifika.

Nia hateten, atu halo manutensaun ba fasilidade HNGV liuliu iha sala VIP presiza orsamentu jerál Estadu foun 2020 ne’ebé aloka ba kapitál menór.

“Ita tenke tau kondisaun ne’ebé mak di’ak ba enfermaria sira-ne’e hotu liuliu iha VIP hodi tau haris fatin ne’ebé mak ho kondisaun di’ak, tau bee manas banhira fatin ne’e prontu ita hadi’a hotu ita mós hasa’e presu ne’e tuir planu husi konsellu nian,” nia tenik tan.

Nia esplika timoroan ne’ebé maka okupa sala VIP hodi baixa kada loron tenke selu $35 no sidadaun estranjeiru hamutuk $50.

“Banhira ita hadi’a hotu ita hasa’e kustu ida-ne’e hanesan maneira sira ne’ebé maka ita hanoin hodi kontribui ba nasaun tanba nasaun ne’e aban bainrua bá-oin ita hakarak reseita ne’e iha hotu,” nia dehan tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here