Diretór Sentru Nasionál Formasaun Profisionál Becora, Lourenço da Silva Gusmão.Imajen/Tome Amado.

DILI, 10 novembru 2020 (TATOLI)—Diretór Sentru Nasionál Formasaun Profesionál Becora, Lourenço da Silva Gusmão, relata durante tinan 19 nia laran sentru formasaun ne’e prodúz ona joven hamutuk 4.124 iha área formasaun oioin hodi integra sira ba iha kampu servisu.

Sentru  Nasionál Formasaun  no Profesionál Becora estabelese iha tinan 2001 liubá no to’o agora fó ona formasaun ba joven feto ho mane hamutuk rihun haat-resin iha área pedreiru, karpintária, kanalizasaun, soldadura, eletrisidade, informátika, mekánika, manutensaun air conditioner ka AC no seluk tan.

Notísia Relevante:Governu prefere konsolida sentru formasaun ida atu forma joven

“Ha’u bele dehan formando sira ne’ebé hili kursu 10 ne’e maioria sira husi área manutensaun AC no panifikasaun (halo dosi) formandu sira ne’e la’ós ba servisu iha ema seluk maibé sira mak kria fali kampu servisu hodi apoiu fali joven sira seluk ,” ezekutivu ne’e dehan ba Tatoli iha ninia servisu fatin, Becora tersa ne’e.

Husi totál formandu ne’ebé maka ramata ona kursu iha Sentru Nasionál Formasaun Becora hamutuk 4.124 ne’e pursentu 75 hetan ona servisu iha instituisaun públiku no kompañia privada.

Tuir nia ba oin sei estabelese kooperasaun ho Sekretáriu Estadu Formasaun Profesionál no Empregu (SEFOPE), atu fasilita formandu sira hodi tuir programa auto-empregu nune’e bele hakbi’it liután abilidade formandu sira-nia hodi kria kampu servisu ba an rasik.

Kona-ba ekipamentu no rekursu umanu iha sentru nasionál ne’ebá, Diretór ne’e esplika iha ekipamentu sufisiente atu formandu sira uza hodi halo prátika no teoria.

Tanba CNFP Becora iha funsionáriu administrasaun no formadór hamutuk ema na’in 62, permanente 22 no kontratadu 40, formadór ba iha área formasaun 10 ne’e hamutuk ema na’in 20.

“Área 10 ne’e ita foin koloka formadór kada área na’in 2 de’it, maibé ita presiza tan rekruta formadór na’in 20 tan hodi bele destaka tan iha kada área  ema na’in ida inklui sei koloka mós iha Sentro Formasaun Beasu,” nia dehan.

Sentru Nasionál Formasaun no Profesionál Becora iha sala hamutuk 10 ne’eb’e fahe ba klase dader no lokraik  no kada sala akumula ema purvolta 48-resin.

Notísia Relevante:Sentru Formasaun 74 Rejistadu Iha INDMO

Jornalista : Tomé Amado

Editór:Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here