Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze jeneralidade ba loron daruak, iha sala plenáriu PN, sesta (02/10). Imajen Tatoli/Egas Cristovão

DILI, 02 outubru 2020 (TATOLI)–Governu liuhosi Sekretaria Estadu Formasaun Profisionál no Empregu (SEFOPE) sei harii sentru formasaun boot iha Metinaro hodi akumula joven sira tuir formasaun.

“Kona-ba formasaun profisionál, em vez de loke tan maibé konsolida de’it ne’ebé iha. Sentru hotu iha ita-nia país, iha últimu tinan 20 la forma ema liu 10.000 enkuantu númeru joven aumenta no rekrutamentu hodi serbisu iha Korea no Austrália komesa aumenta,” tenik Primeiru-Ministru (PM), Taur Matan Ruak, iha diskusaun proposta Orsamentu Jerál Estadu (OJE) 2020 iha faze jeneralidade Parlamentu Nasionál (PN), sesta ne’e.

Tuir Xefe Ezekutivu, prioridade Governu agora maka konsentra fatin formasaun sira ne’ebé ketak tau iha fatin ida de’it.

“Bainhira ita-nia kapasidade laiha atu sustenta hotu, entaun di’ak liu ita halo ida de’it no lojíztikamente ita la duplika. Tanba bainhira harii sentru formasaun haat ka lima maka formadór tenke fahe no gastu operasionál tenke fahe, maibé bainhira konsentra ba ida de’it maka bele rentabiliza rekursu sira,” PM fó hanoin.

Notísia Relevante: Sentru Formasaun Exelente Sei Reduz Dezempregu iha Rai Laran

Molok konstrusaun ba sentru formasaun iha Metinaro ramata, ba dahuluk Governu sei konsentra ba sentru formasaun Becora ho Tibar ne’ebé iha ona.

“Ha’u konkorda tebes katak sentru formasaun Tibar ninia jestaun profisionál tebes no ha’u hanoin iha Timór instituisaun oituan maka hanesan Tibar ein termu jestaun,” nia akresenta.

Tanba ne’e, atu aumenta númeru ba formasaun maka Governu iha hanoin investe iha sentru formasaun sira.

Orsamentu ba konstrusaun obra sentru formasaun exelente iha Metinaro antes ne’e VIII Governu prevee ona iha orsamentu 2020 hamutuk millaun $15.

Daudaun iha hela prosesu dezeñu ne’ebé kuaze konklui ona no sei iha hela faze sosializasaun.

Sentru ne’e sei akumula ema to’o 5.000 no sei harii iha rai ektare 27, tanba ne’e Governu sei fó opsaun rua hanesan indemnizasaun no opsaun seluk mak halo  bairru foun, depende ba afetadu sira mak hili.

Ekipa tékniku sira identifika ona katak komunidade afetadu hosi projetu ne’e hamutuk 74.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here