Diretora Nasionál Instituto Nasionál Dezenvolvimentu Mão de obra (INDMO), Isabel Fernandes de Lima. Imagén TATOLI/Antónia Gusmão.

DILI, 07 outubru 2019 (TATOLI) – Diretora Nasionál Institutu Nasionál Dezenvolvimentu Mão de Obra (INDMO), Isabel Fernandes de Lima, informa INDMO rejista ona sentru formasaun hamutuk 74.

“Durante ne’e sentru formasaun hamutuk 74 maka rejistadu. Hosi totál ne’e 25 mak akreditadu ona, ne’e mai hosi sentru formasaun privada no públiku”, Diretora Nasionál ne’e hatete ba Tatoli iha Lesidere, ohin.

Isabel Fernandes hatutan, sentru formasaun públiku sira ne’ebé akreditadu maka hanesan Tibar, Sentru Formasaun Bekora, CEFTEC, no IADE, maibé la’os akredita instituisaun más akredita programa, nune’e mós iha Polísia Nasionál Timor-Leste (PNTL) tanba sira mós halo formasaun kona-ba investigasaun polísia no jestaun polísia no seluk tan.

Aléinde ne’e sentru formasaun privada mak hanesan Don Bosco Komoro, ETDA, no mós sentru formasaun relijioza sira.

“Kada tinan ami sempre bá halo monitorizasaun kona-ba oinsá hanorin uza kualifikasaun ne’ebé iha tanba iha kritéria ne’ebé estabelese hodi akredita sentru formasaun ne’e haree mós ba kualifikasaun formadór sira, no formadór sé maka iha kompeténsia atu hanorin matéria ida, ida ne’e importante tebes, ne’ebé tinan ida ami vizita sentru formasaun sira dala rua”, dehan Isabel.

Difikuldade ne’ebé INDMO rejista hosi sentru formasaun sira ne’e maka oinsá atu finansia ba sira-nia sentru rasik. Tanba sentru formasaun barak mak depende ba subsídiu hosi Governu.

Entretantu, kritéria hodi hetan akreditasaun hosi INDMO maka edefísiu permanente husi sentru formasaun rasik, jestaun tenke di’ak, kualifikasaun ba formadór sira.

Notísia relevante :MKAE Promete Sei Investe Iha Mão de Obra

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here