Masakre Santa Krús 12 Novembru 1991. Imajen/AMRT

DILI, 08 novembru 2020 (TATOLI)–Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’ hateten, konstrusaun Monumentu 12 Novembru foin mak faze preparasaun ba konkursu nian, tanba ne’e parte Comite 12 Novembru tenke kontribui hodi bele realiza konstrusaun ba monumentu refere.

Notísia Relevante: K12N Husu Konstrui Lalais Monumentu 12 Novembru

Ministru do Ministério Para Os Assunto dos Combantentes da Libertação Nacional, Julio da Costa Sarmento “Meta Malik”. Imajen TATOLI/Eugenio Pereira.

“Ita agora mak ba faze preparasaun ba konkursu. Maibé, husu ba parte Comité 12 Novembru tenke kontribui hodi bele realiza konstrusaun ba monumentu 12 Novembru ne’e tanba demora liu ona. Dezde ha’u sei Sekretáriu Estadu to’o agora, dada-ba dada-mai no agora ha’u sai ministru maibé nafatin de’it,” Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’, informa ba Agência TATOLI iha nia knaar fatin Caicoli, Dili, sesta ne’e.

Oinsán kona-ba dezeñu, Meta Malik hatán, dezeñu iha hotu ona ne’ebé kontinua de’it dezenu ne’ebé mak Kay Rala Xanana Gusmão nia tempu prepara ona. Agora, tuir nia, hein atu hala’o de’it ona maibé husu nafatin ba Comité 12 Novembru atu bele kontribui másimu hodi bele realiza ona duké dada-malu no difísil atu hala’o.

Nia hatutan, Comité 12 Novembru konkorda ona maibé téknikamente mak sei prosesu hela tanba obra mak Ministériu Asuntu Kombatente Libertasaun Nasionál (MAKLN) nian maibé orsamentu ne’e mai hosi Comite 12 Novembru.

Meta Malik hateten, tenke kontribui katak tenke rona malu no halo konkordánsia ho dezenu ne’ebé mak iha no téknikamente presiza Comité 12 Novembru nia kontribuisaun mós tanba Comite 12 Novembru mak sai autór iha momentu ne’ebá.

“Obra ne’e, Estadu mak halo maibé konsidera katak sira rasik mak hahú. Nune’e, atu bele identifika loron ne’e sei sai loron importante ba loriku asswa’in iha rai doben ida-ne’e, Comite 12 Novembru mós tenke involve planu konstrusaun hamutuk ho Governu no kompañia, nune’e iha buat balun sala bele korije malu, labele halo ulun toos depois la konsege halo,” nia dehan.

Tuir planu, Meta Malik hateten, Governu sei halo konstrusaun Monumentu 12 Novembru iha semitériu Santa Cruz, Dili, tanba akontesementu ne’e akontese iha semitériu Santa Cruz bainhira joven sira ba tuir misa ai-funan Sebastião Gomes nian iha igreja Motael.

Tuir nia, kona-ba Jardin Moatel nian ne’ebé to’o oras ne’e nakfilak ona sai Jardin 12 Novembru Motael, nia laiha kompeténsia atu ko’alia maibé nia konsisten nafatin katak sei halo iha semitériu Santa Cruz.

Nia esplika, Konsellu Administrasaun Fundu Infraestrutura (KAFI) husu kompañia ho MAKLN hamutuk hodi hala’o konstrusaun no sira husu atu MAKLN sai konsultan maibé MAKLN la prevee osan ba konsultan nian.

Tuir nia, konstrusaun Monumentu 12 Novembru servisu hamutuk ho MAKLN no Komisaun Nasionál Aprovizionamentu (CNA).

Entretantu, osan ne’ebé mak Governu gastu ba konstrusaun Jardin 12 Novembru Motael ho montante $95,000 ho empreza ALGIS Constraction Lda.

Imajen Masakre Santa Cruz/Espesiál.

Iha tinan 2010, Governu Aliansa Maiória Parlamentár (AMP) inisía atu harii Monumentu 12 Novembru ne’eb’e atu estabelese iha Semitériu Santa Cruz nia oin. Tanba ne’e Governu propoin orsamentu ho montante $500,000 iha polítika Orsamentu Jerál Estadu (OJE) tinan fiskál 2011 nian atu ba nesesidade dezeñu ho estudu viabilidade ne’ebé hetan aprovasaun iha Parlamentu Nasionál.

Monumentu ne’ebé atu fó onra b aba sakrifísiu juventude loriku asswa’in ne’ebé mate iha masakre 12 Novembru 1991 iha semitériu Santa Cruz to’o agora seidauk bele estabelese tanba  Eis Primeiru-Ministru, Kay Rala Xanana Gusmão la konkorda ho Monumentu 12 Novembru ninia dezeñu ne’e tanba ladún iha valor artístiku.

Iha 18 outubru 2010, liuhosi konfer’ensia imprensa, Ministériu Solidariedade Sosiál (MSS) hamutuk ho ekipa ida ne’ebé kompostu hosi Sekretaria Estadu Asuntu Antigu Kombatente Libertasaun Nasionál (SEAAKLN) no Comité 12 Novembru, anunsia abertura konkursu ida ba dezeñu di’ak-liu kona-ba monumentu nasionál Masakre 12 Novembru 1991 nian ne’ebé atu haríi iha rate Santa Cruz.

Imajen Masakre Santa Cruz/Espesiál.

Prezidente Comité 12 Novembru, Gregório Saldanha, hateten dezeñu ne’e tenke hakonu kritériu sira hanesan dezeñu tenke iha valór istóriku, kulturál no relijiozu; tenke reflete mós espíritu asswa’in, patriotizmu, nasionalizmu juventude sira-nian iha tempu ne’ebá; tenke iha ekilíbriu entre arkitetura tradisionál no arkitetura moderna; tenke iha vizaun artístika iha parte arkitetónika nian, kona-ba ordenasaun espasu hodi haree ho aspetu jeográfiku no istóriku, liuliu kona-ba akontesimentu 12 Novembru 1991.

Kritériu seluk mak tenke iha valór edukativu no turístiku, asegura utilizasaun símbolu rezisténsia nasionál nian ne’ebé mak juventude Lorico Asswa’in sira utiliza iha tempu ne’ebá no ikusliu, atu hatete de’it katak laiha restrisaun relasiona ho tipu meteriál konstrusaun ne’ebé atu utiliza.

Hosi konkursu refere dezeñu sanulu ne’ebé di’ak sei hetan prémiu tuir klasifikasaun mak hanesan ba manan-na’in hetan prémiu $10.000, ba segundu klasifikadu prémiu ida $4.000, ba terseiru klasifikadu $3.000, kuartu klasifikadu $2.000 no sira seluk na’in neen (6i) da-ida $1.500.

Notísia Relevante: Konstrusaun Memoriál 12 Novembru iha Faze Prosedimentu Administrasaun

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here