Prezidente interinu PATIFOR, Gregório Saldanha. Imajen Tatoli/Egas Cristovão

DILI, 28 juñu 2019 (TATOLI)Prezidente Komité 12 Novembru, Gregório Saldanha hateten prosesu konstrusaun Monumentu Memoriál 12 Novembru agora dadauk iha faze prosedimentu administrasaun.

“Tinan ida ne’e, ita hein buat hotu loos. Agora iha prosedimentu dokumentu administrasaun no  dokumentu sira la’o loos hotu ona. Ha’u-nia hanoin, tinan ne’e tenke hahú ona konstrusaun  maski ho orsamentu uituan ne’ebé iha, ita hahú hosi faze dahuluk, hafoin tinan tuir mai ha’u fiar Governu sei disponibiliza osan para kontinua halo konstrusaun Monumentu Memoriál 12 Novembru,” nia tenik ba jornalista sira iha Palásiu Governu, sesta ne’e. 

Tuir nia, fundu ba konstrusaun monumentu ne’e la’ós mai hosi Gabinete Apoia Sosiedade Sivíl maibé Governu rasik mak prepara enkuantu Komité 12 Novembru ajuda prosesu ne’e.

Gregório akresenta, buat hotu prontu ona hahú hosi dezeñu no submete ona ba Governu iha tinan hirak liu-ba, maibé iha implikasaun uituan tanba impase polítika entaun dada prosesu atu harii monumentu ne’e.

“Ita tenke pasiénsia atu hein no koordena nafatin para buat hotu la’o loloos. Konstrusaun monumentu ne’e hahú ho orsamentu inisiál ne’e purvolta $300.000 resin, hanesan parte ida hosi montante boot ne’ebé ami halo ona kálkulu no ami tenke hahú ona iha etapa dahuluk ne’e,” nia informa hodi hatutan “Ita atu hein osan barak dala ida mak halo, ita sei la hetan. Entaun, saida mak Governu prepara no bainhira iha ona tenke hahú ona”.

Jornalista: Julia Chatarina

Editór: Xisto Freitas

Lee mós notísia ida ne’e: http://www.tatoli.tl/2018/11/masakre-santa-kruz-nuudar-pontu-nakfilak-ba-ukun-rasik/

HAKEREK NO HATÁN

Please enter your comment!
Please enter your name here