Estudante no juventude sira ho orgullu partisipa loron markante Masakre Santa Krús 1991 hodi lori imajen saudozu sira-nian la'o ain hosi Igreja Motaél bá to'o Semiteriu Santa Krús, Dili, tersa (12/11/2019). Imajen/Rob Baird.

DILI, 12 novembru 2019 (TATOLI) – Prezidente Komité 12 Novembru (K12N), Gregório Saldanha, husu ba Governu atu konstrui lalais momumentu memoriál 12 Novembru iha Santa Cruz no harii monumentu saudozu Sebastião Gomes iha Igreja Motael oin.

“Ami husu ba Governu atu hahú halo konstrusaun lalais ba monumentu 12 Novembru no monumentu Sebastião Gomes atu hatuur istória ho loos atu jerasaun kontinuadór bele hatene,” Prezidente K12N, Gregório Saldanha iha loron markante masakre Santa Cruz ba tinan 28 no loron juventude ba dala-14 iha Santa Cruz-Balide, ohin.

Gregório Saldanha friza kontinua husu hanoin ba ezekutivu atubele realiza planu konstrusaun ne’ebé planeia ona.

“Ami husu permisaun no fó hanoin para hanoin nafatin planu konstrusaun monumentu Santa Cruz no monumentu Sebastião Gomes nian”, nia hato’o.

Prosesu konstrusaun monumentu memoriál 12 Novembru agora dadauk iha faze prosedimentu administrasaun no dokumentu sira la’o loos hotu ona.

Gregório Saldanha fiar Governu sei disponibiliza osan para kontinua halo konstrusaun monumentu memoriál 12 Novembru ne’e.

Tuir nia, fundu ba konstrusaun monumentu ne’e Governu rasik mak prepara enkuantu Komité 12 Novembru ajuda prosesu ne’e. Ba planu no dezeñu prontu ona no submete ona ba Governu iha tinan hirak liubá, maibé iha implikasaun uituan tanba impase polítika entaun dada prosesu atu harii monumentu ne’e seidauk realiza.

Orsamentu inisiál ne’e purvolta $300.000-resin, hanesan parte ida hosi montante boot ne’ebé K12N halo ona kálkulu no tenke hahú ona iha etapa dahuluk ne’e.

Iha fatin hanesan, Sekretáriu Estadu Juventude no Desportu, Nélio Isaac Sarmento, dehan orsamentu ba konstrusaun momoriál 12 Novembru ne’e prevee iha Sekretáriu Estadu Kombatente Libertasaun Nasionál, maibé Governu deside muda fali ba Orsamentu Fundu Infraestrutura.

“Iha tempu besik Governu sei deside hodi bele hahú konstrusaun”, katak.

Entretantu, planu Governu atu harii monumentu 12 Novembru ne’e planeia dezde 2010 no lansamentu ba fatuk dahuluk ba konstrusaun iha tinan 2012 iha semitériu Santa Cruz ho orsamentu millaun $12.

Notísia relevante : Konstrusaun Memoriál 12 Novembru iha Faze Prosedimentu Administrasaun

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here