Sekretáriu Jerál Partidu Frente Revolucionária de Timor-Leste Independente (FRETILIN), Marí Alkatiri. Imajen Tatoli/António Gonçalves

DILI, 06 jullu 2020 (TATOLI)—Sekretáriu Jerál Partidu Frente Revolucionária de Timor-Leste Independente (FRETILIN), Mari Alkatiri, sei keixa membru CPN-CNRT ba Ministériu Públiku (MP) kona-ba akuzasaun simu subornu hosi ConocoPhilips.

“Aban, loron-07 fulan-Jullu tinan-2020, iha oras tuku 10 dadeer, Sekretáriu Jerál FRETILIN, Mari Alkatiri, sei hakat ba Gabinete Prokuradór Jerál da Repúblika iha Colmera, Dili, atu hato’o ninia keixa hasoru membru CPN partidu CNRT nian ne’ebé raut fila-fali lixu hosi tinan-2002 ne’ebé akuza Mari Alkatiri simu subornu hosi Kompañia ConocoPhillips,” haktuir Komunikadu Imprensa ne’ebé Agência TATOLI asesu hosi Gabinete Komunikasaun Sosial FRETILIN, segunda ne’e.

Sekretáriu Jeral FRETILIN esplika, iha tinan barak nia laran nia parte sai vítima ba black campaign oin-oin hahú hosi diskriminasaun vítima ba vingansa oin-oin no vitima ba inveija.

“Tempu to’o ona ba ha’u atu halo apelu ba RDTL nia sistema Justisa no tempu to’o ona atu fó tempu ba Justisa Estadu RDTL nian,” Mari Alkatiri subliña.

Mari Alkatiri hahú ninia luta ba Timor-Leste nia independénsia ho otas ne’ebé nurak tebes, seidauk atinji idade tinan 20. Ninia luta ba Timor-Leste nia Ukun Rasik An sei kontinua to’o ohin loron ho idade tinan 70 liu ona.

“Iha tempu naruk ida hanesan ne’e, ha’u hasoru dezafiu oin-oin. Dezafiu luta kontra kolonializmu, dezafiu luta kontra espansionizmu rejimi Soeharto nian. Maibé, dezafiu ida permanente liu no fo’er liu mai kedas hosi ha’u-nia maluk timoroan sira balu. Besik tinan lima nulu mak ha’u ho ha’u-nia família tomak sai vítima ba sira. Vítima ba diskriminasaun oin-oin, ba ódiu no vingansa, ba inveja,” deham Alkatiri liuhosi Komunikadu imprensa ne’e.

Tuir nia, hahalok aat sira ne’e hasoru nia seidauk para maibé hetok sai boot no forte liután. Até to’o ona iha faze ida-ne’ebé mak ema sira-ne’e rasik la konsege hafahe entre ida-ne’ebé mak lia-loos no ida-ne’ebé mak lia-bosok.

“Agora, iha faze ida-ne’ebé sira tama ba dezesperu, sira haboot tán sira-nia odiu mai ha’u. Sira hatudu momoos sira-nia frakeza, uza lia bosok atu difama, hala’o kalunia ho injuria, atu taka sira-nia sala durante tinan 12 ukun Timor-Leste. Atu halai hosi justisa, sira buka atu trava FRETILIN nia dalan ba vitória,” Mari Alkatiri esplika.

Tanba ne’e mak Sekretáriu Jerál FRETILIN ne’e deside lori keixa ba Ministeriu Públiku hasoru CPN partidu CNRT nian ba lia bosok ne’ebé sira públika hasoru nia. Tanba, tempu to’o ona ba timoroan tomak atu hatene lia-loos kona-ba bosok sira-ne’ebé partidu CNRT nia estrutura no kuadru balun halo.

“Lia-loos de’it mak dalan di’ak ba Timor-Leste ida buras Liu,” Mari Alkatiri konklui

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here