Sekretariu Jeral Partidu FRETILIN, Mari Alkatiri. Imajen Tatoli/António Gonçalves

DILI, 06 novembru 2020 (TATOLI)-Sekretáriu Jerál  Partidu Frente Revolusionáriu Timor-Leste Independente  (FRETILIN), Mari Bin Amude Alkatiri, ohin, ofisiálmente hato’o ona keixa  ba Ministériu Públiku (MP) hodi kontra  membru Bankada CNRT na’in-21.

“Ha’u mai  entrega prosesu keixa krime ida hodi kontra Bankada CNRT hosi xefe bankada to’o nia membru sira, tanba ko’alia la loos agora mai hatama liuhosi Ministériu Públiku depois deside lori ba Tribunál,” Mari Alkatiri informa ba jornalista hafoin rekorre keixa refere ba MP iha edifísiu Prokuradoria Jerál Repúblika (PGR), Colmera, Dili.

Mari Alkatiri, la esplika detallu ba públiku  kona-ba konteúdu keixa tanba sei iha segredu justisa  iha ona MP tanba ne’e nia husu atu jornalista no públiku sira hein prosesu ne’e la’o ba oin.

Nia fó hanoin keixa ne’e relasiona ho membru Bankada CNRT hala’o deklarasaun ida  iha bankada liu hosi konferénsia imprensa ne’ebé   temi nia parte laiha fundamentu, tanba ne’e liuhosi keixa ne’e atu buka justisa.

Antes ne’e  iha loron 07 jullu 2020, Mari Alkatiri, mós hatama ona keixa ba MP hasoru membru Komisaun Polítika Nasionál (CPN) partidu CNRT  kona-ba  akuzasaun  simu subornu husi kompañia ConocoPhillips  ho baze dokumentu  hosi kompañia Oceanic Exploration ne’ebé akuza   katak ConocoPhillips fó subornu ba Mari Alkatiri  hamutuk millaun $2.5

Konteúdu hosi karta prosesu ne’ebé la mensiona  maibé hosi keixa ne’e hosi CPN-CNRT hahú hosi Vise Prezidente Virgílio Smith to’o mai kraik, hodi buka justisa, tanba akuzasaun sira durante iha media sosiál laiha fundamentu

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here