Diretór Ezekutivu Servico Autonomo Medicamentos Equipamentos Saúde (SAMES), Santana Martins. Imajen Tatoli/Egas Cristovão

DILI,28 outubru 2020 (TATOLI)—Servisu Autónomu Medikamentu no Ekipamentu Saúde (SAMES), daudaun ne’e hahú identifika ai-moruk hamutuk item tolu maka promethazine xarope, amoxilin clavulanate, betadina ne’ebé maka ninia utilizasaun sei to’o de’it loron 31 fulan-outubru 2020.

Diretór SAMES Santana Martins hateten medikamentu oin tolu ne’e SAMES sosa iha tinan 2017 no 2018, maibé la konsege halo distribuisaun to’o ramata tanba Postu Saúde, Sentru Saúde, Ospitál Referál no Nasionál sira sei iha estoke sufisiente.

Notísia Relevante:CAC, IJE, PDHJ,KFP halo inspesaun urjensia ba SAMES

“Amoxiline clavulanate ida ne’e mós tama hotu iha kategoria esensiál no ai-moruk ne’e ita sosa ba ema ne’ebé mak mear no moras todan sira entaun sasán sira ne’e ita la konsege distribui hotu no balun liu prazu tanba iha fasilidade saúde sira sei iha,” nia relata ba Tatoli, iha ninia servisu fatin Kampung-Alor Dili, kuarta ne’e.

Nune’e mós ai-moruk betadina no amoxilin xarope, la konsege distribui to’o hotu tanba iha baze sei iha estoke natoon atu halo tratamentu ba pasiente sira. Betadina ho ninia funsaun maka atu kura kanek.

“Item tolu ne’e liu prazu iha 31 outubru entaun ami presiza retira para produtu ne’e labele kahur fali ho produtu sira seluk ne’ebé mak ita sei uza hela,’’ nia dehan.

Tuir prosedementu legál kada tinan iha fulan dezembru maka SAMES sei destroi medikamentu hirak ne’ebé identifikadu liu ona prazu.

Notísia Relevante:SAMES rekoñese rejeita importasaun ai-moruk item tolu

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here