Ekipa konjunta kompostu hosi CAC, PDHJ no CFP Halo inspesaun ba SAMES. Imajen Tatoli/Egas Cristovão

DILI,26 outubru 2020 (TATOLI)—Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, rekoñese foinlalais ne’e rejeita ona ai-moruk item tolu hanesan Dopamine, Amoxilin Xarope,  no Erythromycin ne’ebé maka esporta husi Kompañia ESCO Internasionál husi Índia ho orsamentu hamutuk rihun $ 63 tanba la priénse padraun Internasionál no laiha kualidade.

”Item tolu ne’e ami  teste iha Terapeutic Goods Admistration iha Australia no item tolu ne’e ho orsamentu hamutuk rihun 63 ne’ebé mak agora iha ona prosesu nia laran  para kompañia bele devolve  filafali osan  ne’ebé mak iha,’’ nia informa ba Tatoli iha ninia servisu fatin Kampung-Alor Dili segunda (26/10).

Notísia Relevante:CAC, IJE, PDHJ,KFP halo inspesaun urjensia ba SAMES

Daudaun ne’e, SAMES fó ona sansaun indisiplinár ba Kompañia refere tanba sosa ai-moruk latuir kontratu ne’ebé maka parte rua estabelese ona.

”Agora ba oin kompañia nian ne’e la partisipa iha prosesu tomak ami nian no taka dalan ba nia to’o xamada atensaun ne’e to’o tinan 2021 no desizaun ne’ebé mak iha ita hapara ona kompañia no hasai nia husi pre-kualifikadu,’’ Santana dehan.

Tinan 2021 maka SAMES foin iha planu atu halo filafali re-avaliasaun ba kompañia forñesedór ne’e atu kontinua forñese ai-moruk ba SAMES ka hapara totál.

“Iha tinan 2021 mak hahalok la di’ak nafatin Governu Timor-Leste taka tomak ba kompañia para labele partisipa konkursu ne’ebé mak iha tanba ba oin ita asegura nia kualidade no medikamentu ne’e tenki tuir padraun ne’ebé mak OMS rekomenda,” nia hateten.

Entretantu, ekipa konjunta kompostu husi Komisaun Anti Korupsaun (CAC-sigla portugés), Inspesaun Jerál Estadu (IGE-sigla portugés), Komisaun Funsaun Públika (CFP-sigla portugés) no Provedória Diretu Umanu no Justisa (PDHJ), foinlalais ne’e halo inspesaun urjénsia ba SAMES hodi deskobre mosu irregularidade iha prosesu sosa medikamentu ne’e.

Notísia Relevante:KFP, KAK, PDHJ ho IJE Koopera Malu ba Asegura Governasaun Di’ak iha Instituisaun Estadu

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here