Ekipa konjunta kompostu hosi CAC, PDHJ no CFP Halo inspesaun ba SAMES. Imajen Tatoli/Egas Cristovão

DILI, 22 outubru 2020 (TATOLI)—Ekipa konjunta ne’ebé kompostu husi Komisaun Anti Korupsaun (CAC-sigla portugés), Inspesaun Jerál Estadu (IGE-sigla portugés), Komisaun Funsaun Públika (CFP-sigla portugés) no Provedória Diretu Umanu no Justisa (PDHJ), iha kinta ne’e halo inspesaun urjensia ba Servisu Autónomu Medikamentu no Ekipamentu Saúde (SAMES) tanba mosu irregularidade balun durante prosesu sosa medikamentu.

“Ami halo inspesaun ida no vizita ba ai-moruk sira ne’ebé mak la tuir rekezitu no padraun ne’ebé mak iha,” Inspetór Jerál Estadu, Francisco de Carvalho, dehan ba jornalista sira iha Armazen SAMES Kampung-Alor Dili, ohin.

Notísia Relevante:KAK, IJE, PDHJ ho KFP Buka Tuir Indísiu KKN Rekrutamentu Traballadór iha SEFOPE

Ispesaun urjente ne’e tuir nia bazeia ba orientasaun Primeiru-Ministru, Taur Matan Ruak, tanba deskonfia prosesu sosa ai-moruk balun la tuir padraun internasionál no laiha kualidade.

“Ai-moruk sira ne’ebé mak iha item barak ne’e husi item tolu mak hetan reseisaun husi SAMES ho ida ne’e ita labele distribui ai-moruk ne’e ba kamunidade sira dahuluk ami nota katak ai-moruk sira ne’ebé la tuir padraun internasionál ne’e signifika ita lakon tanba direitu atu atende ba komunidade sira, daruak tanba saida mak ida ne’e akontese tanba SAMES seidauk iha laboratóriu própriu ida atu halo teste ba medikamentu sira ne’e,” nia esplika.

Aleinde ne’e, ekipa konjunta ne’e mós deskobre jestaun distribuisaun ai-moruk iha SAMES ladun di’ak maka afeta ba ai-moruk balun liu prazu fulan ida ona no labele uza.

“Aimoruk oin tolu mak la priénse rekezitu mak ai-moruk Amoxilin, Dopamine, no Erytromycin mak hetan reseisaun no sira justifika mai ami katak ai-moruk ne’ebé hetan reseisaun ne’e sei la distribui no sira buka hela meius oinsá para destroi,” nia hateten.

Iha fatin hanesan Diretór Ezekutivu SAMES, Santana Martins, informa prontu koopera ho ekipa konjunta hodi fó informasaun kona-ba problema hirak ne’e.

“Ai-moruk sira ne’e to’o tiha mai mak ita halo resepsaun no inspesaun mak foin identifika katak ai-moruk ne’e la tuir padraun tanba papel resepsaun no inspesaun ne’e hatuur iha lei katak nia mak tenki inspensiona haree teste laboratóriu ba produtu hotu-hotu katak nia kualidade ne’e oinsá se karik sira resepsaun hetan sasán sira ne’ebé mak laiha kualidade entaun ida ne’e mai nia kna’ar atu rejeita medikamentu sira ne’e,” nia hateten.

Notísia Relevante:KFP, KAK, PDHJ ho IJE Koopera Malu ba Asegura Governasaun Di’ak iha Instituisaun Estadu

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here