Diretora Jerál Prestasaun Servisu Saúde, Odete Viegas. Imajen Tatoli/Egas Cristovão

DILI, 28 outubru 2020 (TATOLI)—Diresaun Nasionál Farmásia no Medikamentu Ministériu Saúde iha kuarta ne’e realiza workshop ida kona-ba liña koordenasaun no harmonizasaun ba importasaun no distribuisaun produtu farmaseutíka iha Timor-Leste.

“Sorumutu ida ne’e tinan-tinan sempre hala’o atu harmoniza fali servisu sira ne’e no mós atu hadi’a di’ak liután mekanizmu koordenasaun ba iha produtu ai-moruk sira ne’ebé maka Ministériu Saúde fó ba distribuidór no importadór sira halo parte mós iha papél ida ne’ebé maka hatuur iha dektretu lei númeru 12/2004,” dehan Diretora Jerál Prestasaun Saúde, Odete Viegas da Silva, ba jornalista sira iha salaun Ministériu Saúde Caicoli, kuarta ne’e.

Notísia Relevante:MS Hala’o Worshop Kona-ba Jestaun Forñesimentu Medikamentu

Distribuidór no importadór tenki priénse rekezitu hanesan dokumentu, fatin no rekursu umanu, selu impostu no seluk tan bainhira hakarak loke farmásia.

“Tanba ne’e baihnira sira hatama pedidu mai (Ministériu Saúde) ekipa sei tun bá halo inspensaun fatin ne’ebé maka sira atu uza no sei haree fali mós ba rekezitu sira ne’ebé sira priénse ne’e bainhira rekezitu sira ne’e priénse ona tuir kritéria maka ita fó lisensa, no sira tenke selu iha banku maka sira bele importa ai-moruk hosi rai-liur mai,” nia dehan.

Iha workshop ne’e mós atu haree liliu kondisaun no kapasidade husi importadór no distribuidór sira-nian atu importa no distribui ai-moruk iha ámbitu COVID-19.

”Durante ne’e ita  iha servisu importadór  hamutuk na’in 21, kompañia 20, distribidór hamutuk 24. Sira ne’e aplika sai distribuitór no importadór, no sira tenke priénse rekezitu ne’ebé maka iha Sentru Farmásia ne’e rasik,” nia dehan.

Iha fatin hanesan Diretór Farmásia Médikamentu, Alito Gusmão Lopes, hateten Farmásia Nasionál Medikamentu obrigatóriu atu fahe informasaun ba importadór no distribuidór  sira nune’e kumpre regulamentu ne’ebé maka Ministériu Saúde estabelese ona.

Entretantu, workshop ne’e partisipa mós husi klínika no farmásia privada , importadór no distribuidór sira.

Notísia Relevante:Importa Produtu Herbal Mai TL Tenke Iha Autorizasaun Husi MS

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here