Ai-moruk herbal. Foto/Google.

DILI, 14 agostu 2019 (TATOLI)—Xefe Departamentu Autorizasaun  Introdusaun  Merkadu  Produtus Farmásia no Medikamentus,  Diresaun Nasionál Farmásia husi Ministériu Saúde, Inacio da Costa, hateten dekretu lei Nú. 12/2004 define loloos katak produtu herbal ne’ebé importa mai Timor-Leste ne’e tenke iha autorisazaun husi Ministériu Saúde liliu Diresaun Nasionál Farmásia.

“Lei fó dala hodi kontrolu produtu herbal sira ne’ebé mak iha Timor-Leste. Atu regula produtu ne’e mak husi Diresaun Nasionál Farmásia nia kompeténsia tomak no medikamentus hanesan atu regula ne’ebé bolu prátika boa distribuisaun farmásia medikal no mós boa pratika farmásia,” hateten Xefe Departamentu Autorisazaun Introdusaun Merkadu Produtus Farmásia no Medikamentus Diresaun Nasionál Farmásia husi Ministériu Saúde, Inacio da Costa, ba Ajénsia TATOLI liuhusi entrevista ne’ebé hala’o iha nia knaar fatin, Palásiu das Cinzas, Caicoli, Dili, kuarta (14/8/2019).

Nia informa, ita konsidera produtu herbal ne’e sai  hanesan produtu farmasia no prosesu mós la’o daudaun. Tanba ne’e, ita atu kria ona sistema hanesan ekipa konjuntu hodi halo kontrolu ba produtu herbal ne’e mak ita bolu dehan atividade regulár inspesaun.

Tanba, tuir nia, produtu hotu-hotu tama mai iha nasaun ida ne’e sei rejistu hotu iha Diresaun Nasionál Farmásia Inspesaun Jeral Saúde no mós alfadega, SERVE, ho Gabinete Lisensiamentu Atividade Saúde nian.

Nia haktuir, sirkular ne’ebé Ministériu Saúde fó sai hodi orienta atu kontrolu ba produtu herbal ne’e hahú iha tinan 2017 maibé prátikamente produtu herbal ne’e tama sai Timor-Leste kle´ur ona.

“Produtu herbal ne’ebé presiza kontrolu obrigaáoriu mak tenke rejistu hotu iha Diresaun Nasionál Farmásia. Primeiru, rejistu autorizasaun hodi halo atividade atu bele fa´an produtu herbal. Segundu, hetan autorizasaun husi Gabinete Lisensiamentu Atividades Saúde nian no  obrigasaun atu halo rejistu ida no lori mai Diresaun Nasionál Farmásia para ami verifika sasán sira tama mai ne’e loos ka lae,” dehan Inacio.

Nia informa, empreza ne’ebé hetan rejistu no hetan autorizasaun husi Ministériu Saúde liliu Diresaun Nasionál Farmasia hodi faan sira-nia produtu herbal mak Kompañia B. A Gomi-2 Unipesoal Lda no Kompañia Jomardo Lda.

Empreza sira seluk ne’ebé seidauk hetan rejistu ne’e, tuir nia, signifika  seidauk iha autorizasaun atu importa produtu herbal hodi distribui, sirkula no utiliza iha Timor-Leste. Empreze hirak ne’ebé seidauk rejistu iha Diresaun Nasionál Farmásia nian, hirak ne’e ita bolu ilegal.

Hanesan produtu K-Link Internasional ne’ebé mak faan herbal, nia haktuir, foin mak mai hatama sira nia pedidu ba iha Diresaun Nasionál Farmásia hodi halo inspesaun ba sira-nia atividade hirak ne’e maibé sira-nia produtu seidauk rejistu.

Notísia relevante:Aimoruk Herbal Barak Seidauk Rejistu Iha Ministériu Saúde

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here