Agrikultora, Juliana Biroki. Imajen/Julião “Abekha Raihusar” de Andrade.

AILEU, 28 outubru 2020 (TATOLI)—Rai-hun mutin. Anin dadeersan be huu halo ruin sira kolen. Malirin. Manu-maus sira be rani iha ai-leten basa-liras hodi hananu “kokoroykoo..!” Lian hananu ne’e fanu agrikultór sira iha Rai-Husar Aileu, haklelak-aan hadeer hodi hala’o sira-nia knaar. La helik tan. Manu-fuik sira mós be kokorek iha ai-laran tuan ne’ebá ne’e mós fanu balada-liras no balada-liras laek sira hadeer hodi hadau malu atu moris ba moris foun.

Notísia Relevante: Populasaun Munisípiu Aileu 75% moris nu’udar agrikultór

Manu-maus no manu-fuik sira-nia lian hananu iha kada dadeersan ne’e, hanesan alarma natureza nian ida be feitu hodi fanu agirkutóra, Juliana Biroki, hadeer hodi buka moris. Bainhira rona manu kokorek ona, Biroki tenke hadeer hodi perpara hahan ba ninia oan na’in-lima no nia laen-kaben. Hanoin ida-de’it. Ba oan sira-nia futuru, nia tenke hadau malu ho rai-hun mutin atu to’o lalis iha ninia toos kuda modo nian antes rai naroman no loromatan hadeer.

Hosi loron ba loron, iha kada dadeersan, Biroki haklelak-aan haloot sasán agrikultura nian no prepara bukae ba kalsu kabun loron ida-nian hodi lori tutuir ba toos. Nia hakat sai hosi uma iha Aileu-Vila, hakat ho esperansa ua’in. Hakat no hakat, la’o tuir dalan, ain ne’e hakat to’’o duni iha toos kuda modo nian be nahe-aan iha Aldeia Talifurleu, Suku Seloi-Kraik, Postu Administrativu Aileu Vila, Munisípiu Aileu. Dalaruma nia sa’e karreta. Dalabalun, bainhira karreta laiha, nia la’o-ain de’it.

“Ha’u nunka mais baruk atu kuda modo,” dehan agrikultór ortikultura, Juliana Biroki, ba Agência TATOLI iha Aldeia Talifurleu, Suku Seloi-Kraik, Postu Administrativu Aileu Vila, Munisípiu Aileu, tersa (27 outubru 2020) ne’e.

Imajen/Julião “Abekha Raihusar” de Andrade.

Maske otas atu nakaras ona maibé nia la baruk atu kuda modo no la baruk atu kaer servisu. Intensaun ida de’it. Servisu ba oan sira no serbisu hodi hatutan moris ba moris ida ne’ebé bele moris mesak. Maske nia oan na’in-lima maibé nia la tane liman ba ema ida. Nia só tane liman ba nia aan rasik. Ho responsabilidade ida be nakonu katak Maromak titip ona oan bia nia, nu’udar inan-ida iha responsabilidade atu servisu hodi fó han ba oan sira.

Ho espíritu servisu nian be buras, bainhira modo sira-ne’ebé nia kuda ne’e atu moris buras no fó buras, nia esforsu-aan hodi buka rasik bee atu rega modo. Maneira ida fasil ba nia mak fura bee rasik iha ninia toos laran. La’ós bee de’it maibé materiál agrikultura ba ortikultuta nian hanesan plástiku, rede taka modo, inklui adubu be atu habokur mod sira-ne’e, nia rasik aranja mesak. Nia la barani tane liman ba Organizasaun Naun Governamentál sira atu fó tulun. Nia mós la afsil tane liman ba Governu atu apoiu nian.

“Maromak fó limanfuan sanulu (10) ba ha’u ne’e atu kaer servisu mesak laós atu tane liman bae ma seluk. Ha’u fura mesak bee mak hodi rega modo. Sasán ne’ebé uza ba modo ne’e ha’u-nian mesak. Hanesan rede taka modo nian ne’e, ha’u sosa ida ho folin $600. Maske sasán ne’e folin karun maibé ha’u nafatin iha korajén hodi kontinua kuda modo, kuda modo, no kuda ba beibeik,” Juliana Biroki hateten ho oin-midar.

Imajen/Julião “Abekha Raihusar” de Andrade.

Kuda be kuda. Rega be rega. Bainhira modo hirak ne’ebé nia kuda ne’e buras no boot ba daudaun, hamnasa-mihis no ksolok ne’e sempre mosu iha ninia oin bainhira nia hamnasa. Tanbasá? Modo be nia kuda no prodús ne’e la’ós natón de’it sai modo-been hodi kalsu netik nia kabun. Maibé, maske propagasaun surtu COVID-19 lolo nia liras to’o Timor-Leste, ninia rezultadu produsaun ortikultura ne’e, nia sempre iha merkadu no bele fó rendimentu ne’ebé di’ak.

“Maske moras COVID-19 maibé ha’u kontinua fa’an ha’u-nia produtu iha merkadu. Loron ida, ha’u faan modo-tahan, bele hetan rendimentu to’o $150. Se modo-tahan folin liu ne’e, ha’u bele hetan to’o $200 kada loron. Ha’u nunka baruk atu modo iha merkadu tanba nesesidade família nian mak obriga. Hosi rendimentu ne’e mak osan balu ha’u uza hodi sosa hahan no osan bal uza ba hodi selu  labarik sira-nia eskola. Espíritu ida-ne’e mak sempre hafanun ha’u hodi kontinua faan ha’u-nia produtu ortikultura ne’e ba nafatin,” Juliana Biroki haktuir.

Notisia Relevante: Governu presiza promove setór agrikultura liuhosi alokasaun OJE 2021

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here