Imajen/Facebook: Julião “Abekha Raihusar” de Andrade.

AILEU, 27 outubru 2020 (TATOLI)—Adjunta Prezidente Autoridade Munisípiu Aileu, Victória Mesquita do Rêgo, hateten populasaun Munisípiu Aileu 75% hala’o moris nu’udar agrikultór ne’ebé sira-nia produtu ortikultura bele bele faan iha supermerkadu sira iha Dili.

“Ita bele dehan populasaun Munisípiu Aileu nian 75% maiória moris nu’udar agrikultór maibé liuhosi sira nia prudutu mak empreza sira hanesan Supermerkadu Lita Store ho Dili Mart mak bele sosa sira-nia produtu ortikulura hafoin lori ba fa’an iha Dili,” Adjunta Prezidente Autoridade Munsisípiu Aileu, Victória Mesquita do Rêgo, ba haktuir ba jornalista sira iha nia knaar fatin Administrasaun Munisípiu Aileu, tersa ne’e.

Victória Mesquita do Rêgo hatutan, hosi populasaun iha Aileu hamutuk 54.173 ne’e maiória hala’o knar nu’udar agrikultór ne’ebé moris ho agrikultura liuliu iha produtu ortikultura nian no ema hirak ne’ebé sai emprezariu ne’e uitoan de’it.

Tanba ne’e, nia hateten, ho prezensa mídia tour ne’ebé hala’o hosi Asosiasaun Jornalista Timor-Leste (AJTL) ne’e bele observa situasaun reál agrikultór Aileu nian hodi sai referénsia no matéria ida ba Governu liuliu ba Ministériu Agrikultura no Peska (MAP).

“Ha’u apresia ho na’in hira nia prezensa ne’ebé bele haree direta kondisaun agrikultór nian iha área rurál ba ita-nia Governu atu tau osan hodi suporta ba agrikultura sira iha área rural liuliu iha Munisípiu Aileu ne’e,” nia dehan.

Tanba, nia informa, daudaun ne’e empreza rua hanesan Supermerkadu Lita Store no Supermerkadu Dili Mart de’it mak sosa produtu ortikultura ne’ebé agrikultór sira produs ne’e labele kobre hotu produsaun hosi agrikultór sira.

“Dala barak modo-tahan no aifuan sira bainhira barak liu la augenta iha merkadu no ikus mai estraga no dodok hotu iha merkadu lokál no nasionál ne’ebá. Dala ida, ha’u ba iha merkadu Taibesi, ha’u haree direta produsaun ai-han estraga no soe tiha de’it. Tanba ne’e, ha’u hanoin na’in hira ba haree iha terrenu,” nia fó hanoin.

Jornalista: Osória Marques

Editór: Cancio Ximenes

.

HAKEREK NO HATÁN

Please enter your comment!
Please enter your name here