Imajen/Facebook: AJTL.

DILI, 27 outubru (TATOLI)—Asosiasaun Jornalista Timor-Leste koopera hamutuk ho OXFAM, ohin, realiza atividade mídia tour ba Munisípiu Aileu no Ermera durante loron tolu ne’ebé hahú hosi 27-29 outubru 2020 ho moto “Investe iha Setór Agrikultura Inkluzivu Liuhosi OJE 2021”. AJTL no Oxfam organiza mídia tour ne’e husu ba Governu presiza investe no promove setór agrikultura liuhosi alokasaun Orsamentu Jerál Estadu (OJE) 2021 ne’ebé mak la to’o 3% ne’e.

Koodenadór Jerente ba Programa Justisa, Ekonómika no Klimátika iha OXFAM, Lúcio Sávio, hateten atividade mídia tour ne’e ho objetivu atu jornalista sira hakbesik-aan ba agrikultór sira hodi hatene no rekolla informasaun liuliu situasaun atuál kona-ba agrikultór sira iha área rural, nune’e sai referénsia ida ba Governu no deputadu sira halo diskusaun iha plenária parlamentár.

“AJTL no OXFAM halo kooperasaun hamutuk hodi organiza atividade mídia tour iha Munisípiu Aileu no Ermera durante loron tolu ho objetivu atu hakbesik ba agrikultór sira hodi hatene no rekolla informasaun no situasaun atuál kona-ba agrikultór sira iha área rurál, nune’e sai referénsia ba deputadu no Governu sira hodi halo diskusaun iha plenária. AJTL no Oxfam organiza mídia tour ne’e husu ba Governu presiza investe no promove setór agrikultura liuhosi alokasaun Orsamentu Jerál Estadu (OJE) 2021 ne’ebé mak la to’o 3% ne’e,”Lúcio Sávio hateten ba jornalista sira ne’ebé partisipa iha atividade mídia tour ne’e liuhosi konferénsia imprensa ne’ebé hala’o iha salaun OXFAM, Hudi-Laran, Dili, tersa ne’e.

Lúcio Sávio hatutan, Governu submete ona Proposta Orsamentu Jerál Estadu (OJE) 2021 nian ba Parlamentu Nasionál no tuir kalendáriu audiénsia públiku no diskusaun iha plenária sei hahú iha fulan novembru 2020 maibé iha dékada ikus ne’e alokasaun OJE ba setór agrikultura ne’e la to’o 3%.

“Iha dékada ikus ne’e alokasaun arsamentu ba setór agrikultura mak la to’o 3% ka menus hosi 3%, maske iha plataforma polítika Governu nian ne’e define agrikultura nu’udar setór importante,” Lúcio Sávio hateten.

Maske tempu ba OJE 2021 ne’ebé la kleur tán sei halo audiénsia públika no sei hala’o debate iha plenária, nia dehan, AJTL no OXFAM hakarak halo kobertura ba komunidade sira liuliu agrikultór sira-nia atividade iha setór agrikultura no aprezenta situasaun reál sira ne’ebé agrikultór sira enfrenta iha área rurál liuhosi notísia.

“Ida-ne’e nu’udar evidénsia ida-ne’ebé bele aprezenta ba makaer ukun sira no públiku katak presiza iha ona seriedade ho planu ne’ebé di’ak no iha konsisténsia ba investe iha setór agrikultura liuhosi OJE 2021,” nia hateten.

Atividade mídia tour ne’e, nia informa, lori jornalista nasionál sira sei hala’o kobertura ba atividade agrikultór sira-nian iha área rurál ne’ebé durante ne’e seidauk hetan atensaun hosi makaer ukun sira, maske agrikultura mak sai setór importante ba Governu no maiória povu Timor-Leste mak moris nu’udar agrikultór.

Bazea ba dadus sensu 2015, nia dehan, hatudu katak 89.816 família mak moris depende ba agrikultura hodi sustenta moris loro-loron nian no tuir planu rekuperasaun ekonómika konsidera setór agrikultura nu’udar setór impartante no prioridade atu investe ho seriedade hodi asegura soberania ai-han ba komunidade.

Jornalista ne’ebé inklina iha mídia tour ne’ebé Asosiasaun Jornalista Timor-Leste ho OXFAM organiza ne’e hamutuk na’in-12 ne’ebé kompostu hosi mídia estatál Agência TATOLI,I.P no RTTL,E.P, mídia privadu Timor Post, Neon Metin, TVE, Lafaek News, Independente, Rádio liberdade, Díli Post, no mídia hosi Sentru Media investigativo (SMI).

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here