iklan

EDUKASAUN, DILI

Jerasaun foun tenke banati espíritu Saudozu Sebastião Gomes

Jerasaun foun tenke banati espíritu Saudozu Sebastião Gomes

DILI, 28 outubru 2020 (TATOLI)—Alumni Parlamentu Foinsa’e Timor-Leste (APFTL) hamutuk ho Organizasaun Juventude neen, iha tersa (27/10) kalan ne’e, organiza programa reflesaun kalan ba Saudozu Sebastião Gomes ninia mate hodi apela ba joven Timoroan hotu atu banati tuir espíritu saudozu nian maka luta ba lialos no paz.

Sekretáriu Estadu Juventude no Desportu (SEJD) iha tinan ne’e fó konfiansa ba Alumni Parlamentu Foinsa’e Timor-Leste hodi organiza komemorasaun loron Masakre Santa Cruz no Selebrasaun Loron Nasionál Juventude 12 novembru 2020 ba dala 29 ho tema jerál “Joven Autór ba Hari’i Sosiedade Resiliente”.

Notísia Relevante:K12N Prefere Jardín Motaél Hanaran Saudozu Sebastião Gomes

“Ita hotu mai hamutuk halibur iha reflesaun ida ne’e hodi promote katak jerasaun foun prontu hatutan luta ne’ebé Saudozo Sebastião Gomes husik hela mak luta ba páz, dame hakmatek domin atu rai Timor bele sai nasaun ida di’ak iha mundu rai klaran,” dehan Bruder Nicolai, iha Igreja Motael Dili, tersa (27/10).

Saudozu Sebastião Gomes mate iha loron 28 fulan-outubru 1991 iha Igreja Motael Dili tanba hetan asalta husi militár Indonézia.

Hanoin hikas tinan 29 liubá kotuk persegisaun militár Indonézia nian ba joven lubuk ida iha Igreja Santu António Motael, no iha ne’e nu’udar loron ikus ba saudozu ninia peregrinasaun iha mundu.

“Se mak bele imajina bala ne’ebé fura borus ninia isin to’o hakotu ninia vida, maibé Sebastião ninia mate fó mai ita rezultadu mak ukun rasik an,” Nia hateten.

Fatin ida ne’e lulik no sagradu ba istória pasadu tanba ne’e, nia tenik tan laiha ema ida mak bele muda ran saudozu nian ne’ebé fakar ona ne’ebá.

“Ita ema bele mate maibé istória nunka mate, istoria ne’e sei ejize jerasaun foun sira kontinua hatutan nafatin,” Nicolai hateten.

Nia observa katak oras ne’e jerasaun foun sira komesa ladun fó valór ba istória ne’ebé hamosu sofrementu no persegisaun oioin hasoru joven sira iha tinan 29 liubá.

“Saudozu Sebastião Gomes ne’ebé husik hela ninia inan-aman tanba hakarak independensia ba rai ida ne’e, desizaun ne’ebé nia foti nunka tetu sofrementu saida mak ninia família liliu inan-aman sei hasoru iha tempu tuir mai tanba laiha ema ida mak bele imajina,” nia informa.

Banda múzika husi Eskola são Pedro Comoro no grupu Acoustic ho múzika mesak versaun 75 no kompleta mós versaun agora nian halo mos sira-nia aprezentasaun iha kalan reflesaun ne’e. No ikus taka ho sunu lilin iha fatin mate Saudozu ninian iha Igreja Motael Dili.

Entretantu, iha loron 28 fulan-outubru ohin, APFTL organiza mós misa  agradesimentu ida iha Igreja Motael Dili hodi ensera programa kalan refelesaun.

Notísia Relevante:Sebastião “Loriku Rai Na’in” La Fó Fatin Ba “Garuda”

Jornalista : Tomé Amado

Editór:Agapito dos Santos

iklan
iklan

Leave a Reply

iklan
error: Content is protected !!