Xefe Estadu Maiór Jenerál F-FDTL, Major Jenerál Lere Anan Timur ho Embaixadóra Estadu Unidu Amerika, Kathleen Fitzpatrick, partisipa iha lansamentu programa ezersísiu “Cobra20-2”, foin lalais ne’e, iha Baucau. Imajen Tatoli/Eugénio Pereira

DILI, 27 outubru 2020 (TATOLI) – Komandu FALINTIL – Forsa Defeza Timor-Leste (F-FDTL) liuhosi ekipa ezersísiu “Cobra20-2” servisu hamutuk ho Komisaun Reguladór Arte Marsiál (KRAM) sei organiza membru Grupu Organizasaun  Arte Marsiál (GAM) hosi  Persaudaraan Setia Hati Terate (PSHT), Ikatan Keluarga Silat (IKS) Kara Sakti no Kmanek Oan Rai Klaran (KORK) sei tuur hamutuk badame-malu hodi evita konflitu iha komunidade nia leet.

Notísia Relevante : KRAM Sosializa Regra Arte Marsiál Ba PSHT, IKS ho KORK

Esforsu ezersísiu “Cobra20-2” ho KRAM nian ne’e sei halo mós juramentu entre membru grupu arte marsiál tolu ne’e  iha loron 29 outubru 2020, ne’ebé konsentra iha Suku Nunira, Postu Administrativu Laga, Munisípiu Baucau.

Asaun dame ne’ebé inisia hosi  ekipa ezersísiu Cobra20-2 no KRAM ne’e nu’udar parte ida atu lori membru organizasaun arte marsiál sira kontribui ba paz no unidade no evita akontesimentu sira liubá ne’ebé rezulta sunu komunidade nia uma no halo komunidade sai vítima iha área Nunira, Postu Administrativu Laga, foin lalais ne’e.

Diretór ezersísiu “Cobra20-2”, Koronél Cesario Salustiano Ximenes “Haksolok” hateten, asaun dame ne’ebé Komandu F-FDTL no KRAM sei organiza iha Laga atu lori dame ba povu.

“Ezersísiu “Cobra20-2” ida ne’e tenke lori haksolok ba ita nia povu, tanba área ne’ebé imi atu ba ne’e foin lalais mosu konflitu, sunu uma, halo povu loron-kalan atu ba toos no kuru bee moos mós ta’uk. Agora iha Nunira mesak família maka sunu-malu, imi nia prezensa la’ós atu hata’uk sira, maibé ba para halo sira hadomi imi no halo ita nia alin sira iha Grupu Organizasaun Arte Marsiál sira bele moris iha dame nia laran,” atuál Komandante Centro Formasaun Terrenu (CFT) F-FDTL Metinaro,  Koronél Cesario Salustiano Ximenes “Hasolok” hateten iha Suku liuhosi komunikadu imprensa ne’ebé Agência Tatoli asesu, ohin.

Nia dehan, nasaun Timor-Leste no povu sira sente triste tebes, problema asaltu malu entre GAM foin lalais Aldeia Uasilawa, Suku Nunira, Postu Administrativu Laga, Munisípiu Baucau, rezulta komunidade nia uma 12 no motor ida maka hetan sunu.

Komandante Halsolok hatutan, agora la’ós ona tempu ba juventude sira atu kria problema hodi halo povu moris trauma beibeik.

Antes ne’e, Xefe Aldeia Uasilawa, Alberto Pinto Ribeiro dehan, konflitu ne’ebé akontese ligadu ho kazu sona vítima Leonel Freitas ne’ebé akontese Baucau Vila Nova, Tirilolo, hodi hada’et to’o sunu populasaun sira-nia uma iha nia aldeia.

Notísia Relevante : Ezersísiu “Cobra20-2” orienta forsa haklaken dame

Sosializa Lei Arte Marsiál iha Sagadati

Iha oportunidade ne’e, ekipa ezersísiu “Cobra20-2 no KRAM halibur mós membru  GAM tolu hodi halo sosializasaun ba lei arte masiais iha Suku Sagadati, Postu Administrativu Laga.

Prezidente KRAM, Octavio da Conceição dehan, iha rezolusaun Arte Marsiál númeru 4/2020 publika ona iha Jornál Repúblika no KRAM rasik sosializa ona ba grupu GAM sira iha loron 10 juñu 2020 ho ninia rekizitu hamutuk 18 ne’ebé GAM sira tenke prienxe.

Prezidente KRAM hatutan, iha grupu GAM sira ne’ebé seidauk rejistu komesa ona treinu subar, maibé iha rezolusaun númeru 4/ 2020 iha lei númeru 2 hateten sei orienta nafatin komandu PNTL atu halo servisu intensifika para kontrola nafatin arte marsiál sira ne’ebé pratika ilegál ne’ebé previstu iha artigu 24 no 25 iha lei númeru 5/2017 bele hetan kastigu.

Iha parte seluk, Koordenadór Organizasaun Arte Marsiál KORK, Amâncio Mendes hato’o agradese ba Komandu F-FDTL no KRAM hodi halo vizita no sosializa direita regra ka lei ba membru grupu GAM sira no autoridade sira.

Nia dehan, KORK agradese tebes, tanba prezensa militár ho KRAM bele esplika regra no prosedimentu arte marsiál  ba joven sira iha Sagadati atu bele komprende, tanba joven barak tuir treinamentu, maibé la hatene regra.

“Ha’u reprezentante KORK atu informa de’it katak, ami sente kontente, tanba ita nia militár sira ho KRAM halo sosializasaun ba lei arte marsiál  iha ami nia Suku Sagadati hanesan informasaun importante ida juventude sira ne’ebé tuir treinu tenke hatene regra no lei atu labele halo problema beibeik,” nia hateten.

Nia rekoñese iha Suku Sagadati grupu arte marsiál tolu eziste hotu, maibé joven barak mak agora iha Dili no nia parte prontu sosializa tutan informasaun ne’e ba membru sira seluk atu kontribui ba dame.

Diretór ezersísiu “Cobra20-2”, Koronél Cesario Salustiano Ximenes “Haksolok” husu atu membru GAM tolu koopera no halo tuir regra ne’ebé KRAM fó sai.

Haksolok hatutan, bainhira membru GAM sira halo tiha juramentu maka kontinua kria beibeik provoka malu no hamosu konflitu Komandu F-FDTL no PNTL sei la tolera.

“Ha’u husu arte marsiál  sira tenke mai partisipa iha atividade sosializasaun ne’ebé militár ho KRAM halo hodi rona no halo tuir, nune’e treinu labele viola regra, se la rona, ami sei halo atuasaun,” nia apela.

Programa Komandu F-FDLT  nian hodi realiza ezersísiu “Cobra20-2” hala’o durante loron 12 ne’ebé sei ensera iha loron 29 outubru 2020.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here