logo tipu arte marsiál PSHT, KORK no IKS Kera Sakti. Imajen/Repro

DILI, 10 juñu 2020 (TATOLI)- Sekretáriu Estadu Juventude no Desportu (SEJD) liuhusi Komisaun Reguladór Arte Marsiál Timor-Leste (KRAM), ohin, hala’o enkontru ho lider grupu arte marsiál (GAM) sira hodi sosializa regra no kritériu rejistu organizasaun arte marsiál hodi bele kumpre, molok sira reativa atividade iha Timor-Leste. 

Prezidente KRAM, Octavio da Conceição, dehan enkontru ne’e importante hodi introdús rezolusaun Governu númeru 4/2020, 2 marsu, ne’ebé revoga tiha rezolusaun númeru 16/2013 hodi fó informasaun ba GAM tolu hanesan, Persaudaraan Setia Hati Terate (PSHT), Ikatan Keluarga Silat (IKS) Timor-Leste  ho Kmanek Oan Rai Klaran (KORK) bele kumpre regra sira-ne’e.

Molok GAP tolu ne’e atu reativa atividade treinu, presiza kumpre kritériu rejistu 18 hanesan, 1), Estatutu federasaun/organizasaun ho lian Tetun no Portugés ne’ebé aprova iha asembleia jerál, 2), Akta kongresu federasaun ka organizasaun, 3), Estatutu Federasaun/Organizasaun, kartaun identidade (BI, Kartaun Eleitorál no dokumentu relevante), 4), Patrimóniu organizasaun.

5), Atributu no materiál ne’ebé utiliza hodi pratikante arte marsiál uza durante iha fatin treinu, 6) Mapa lokalizasaun treinu no fatin eskritóriu, 7), Fundadór mínimu ema na’in-10 kompleta ho kartaun (BI, Kartaun Eleitorál no dokumentu relevante), 8) Boom komportamentu treinadór ba sentru, klube no eskola ne’ebé destinu ba pratika arte marsiál, 9), Atestadu médiku treinadór.

10), Karta autorizasaun husi xefe suku no na’in ba rai (ba fatin treinamentu no fatin eskritóriu), 11), Nivel sertifikadu, 12), Foto treinadór, 13), totál membru tenke na’in-50 kada sentru, klube ka eskola, 14), Baze de dadus husi membru hotu no nia responsavel iha  munisípiu 12 inklui REAO, 15), Karta afiliasaun husi federasaun/organizasaun internasionál (ba organizasaun ne’ebé mai husi estranjeiru).

16), Deklarasaun husi sentru, klube ka eskola atu la afilia ba partidu polítika, 17), Deklarasaun la iha konflitu internal no externa organizasaun no 18), karta rekomendasaun husi FESTIL (ba organizasaun ne’ebé hamahon aan iha FESTIL).

“Ita fó informasaun ba organizasaun arte marsiál tolu, PSHT, IKS no KORKA ne’ebé indikadu iha rezolusaun foun ne’e iha informasaun natoon hodi realiza fila-fali sira-nia atividade no kritériu sira-ne’e sosializa tuir lei númeru 5/2017 kona-ba GAM,” informa Prezidente KRAM, Octavio ba jornalista iha SEJD, Lecidere, Dili.

Iha tempu besik, KRAM sei organiza fali enkontru hanesan ho Organizasaun Arte Rituál sira para depois bele introdús rezolusaun ne’e no entrega mós kritériu hodi sira hotu-hotu bele hakbesik-an ba sekretariadu KRAM hodi hahú prosesu rejistu foun ba organizasaun ne’ebé seidauk rejistu no rejistu ba organizasaun sira-ne’e hodi re-atualizasaun ba GAM hotu-hotu ne’ebé hamahan-an iha FESTIL.

“Bainhira organizasaun sira-ne’e rejistu hotu ona, fasil ba Governu bele halo kontrolu ba sira-nia atividade,” nia hateten.

KRAM sei kontinua akompaña bainhira GAM no Organizasaun Arte Rituál sira kompleta ona dokumentu sei legaliza sira-nia atividade no KRAM sei koordena fali ho PNTL hodi sosializa regra sira-ne’e para PNTL bele iha koñesimentu.

Kona-ba knaar PNTL mantein aplika lei númeru 5/2017, Prezidente KRAM dehan, sira sei esplika prosesu tomak ba Komandu PNTL hodi kumpre.

“KRAM kontinua koopera ho PNTL hodi haree prosedimentu kona-ba prosesu atu reativa organizasaun arte marsiál tolu ne’e. Kompeténsia seguransa ne’e PNTL ninia, KRAM atu administra de’it hodi rekomenda ba Ministériu Justisa, Diresaun Nasionál Notariadu, hodi hetan legalizasaun ba atividade GAM nian tomak,” nia hateten.

Tuir dadus ne’ebé KRAM simu organizasaun arte marsiál no organizasaun desportu sira ne’ebé daudaun hamahan-an iha FESTIL hamutuk organizasaun sia (9).

Prontu Kumpre Regra

Iha fatin hanesan, Sekretáriu Jerál PSHT, Pedro Aparicio, Sekretáriu Jerál IKS, Silvester Xavier no Sekretáriu Jerál KORK, Agostino Gusmão, deklara sira prontu koopera hodi prienxe rekizitu ne’ebé fó sai ona.

Lider organizasaun tolu ne’e prontu atu sosializa kritériu ne’e ba membru hotu- hotu atu evita-an kria konflitu hodi lori organizasaun tolu kontribui ba pás no hamorin naran organizasaun nu’udar atividade desportu ne’ebé hamorin  organizasaun no nasaun Timor-Leste.

“Ami agradese ba Primeiru-Ministru, Taur Matan Ruak, ne’ebé reativa fali GAM tolu, ami ko’alia rekizitu sira ami tenke kumpre para bele rejistu ba organizasaun,” hateten Pedro Aparicio.

Nia dehan, antes halo rejistu ba membru sira, husu atu PNTL labele halo atuasaun ho forsa iha terrenu kona-ba konsolidasaun ba membru GAM sira.

PSHT mós sei halo sosializasaun no kongresu organizasaun nian hodi hato’o ba membru hotu-hotu kumpre.

“Ami komprometidu katak, aktu sira ne’ebé akontese ona, sei la akontese iha futuru mai, tanba ami sei hadi’a hodi kontribui ba nasaun tenke la’o ba oin ho dame, ami kontrola membru sira bele minimiza krime sira,” Pedro Aparicio afirma tan.

Iha fatin hanesan, Sekretáriu Jerál IKS, Silvester Xavier, mós deklara sira prontu koopera hodi rejistu organizasaun iha KRAM hodi hetan legalidade.

IKS hato’o agradese ba Governu loke fila fali atividade organizasaun ne’e bele fasil halo kontrolu bainhira membru sira komete iha kazu krime.

IKS mós prontu atu lori organizasaun kompete iha atividade desportu hodi hamorin naran organizasaun nian.

Parte seluk, Sekretáriu Jerál KORK, Agostino Gusmão,  hateten sira-nia parte prepara ona dokumentu kompletu kona-ba rejistu membru nian iha tempu besik sei hatama ba KRAM.

Agostino hatutan, KORK mós sei halo kontrolu másimu ba nia membru sira hodi evita envolve aan iha kuakér kazu krime ne’ebé la merese atu akontese hodi hafo’er naran organizasaun.

Organizasaun tolu promete sei serbisu hamutuk ho Komandu PNTL no F-FDTL kontribui ba estabilidade seguransa iha Timor-Leste.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here