BUACAU, 19 outubru 2020 (TATOLI)-Komandu FALINTIL-Forsa Defeza Timor-Leste (F-FDTL) ohin, ofisiálmente halo abertura ba segundu ezersísiu “Cobra20-2” tinan 2020 liuhosi parede militár iha Komponente Terrestre, Baucau.
Notísia Relevante : Komandu F-FDTL apresia ezersísiu “Harii Hamutuk”
Abertura ezersísiu ne’e hala’o direita hosi Xefe Estadu Maiór Jenerál F-FDTL, Majór Jenerál, Lere Anan Timur partisipa hosi forsa kompañia ida, kompostu Komponente Terrestre, Navál, Centro Formasaun Terrenu, Kompetente Apoiu Servisu, Polísia Militár no Kuartél Jenerál.
Lere dehan, objetivu hosi ezersísiu Cobra atu orienta forsa sira implementa sira nia formasaun militár atu haklaken dame ba povu sira ne’ebé moris iha situasaun ameasa bele sente seguru ho prezensa F-FDTL.
Durante loron 19 to’o 30 setembru 2020, membru F-FDTL sira sei hala’o treinamentu militár no halo asaun karidade ba povu kbiit laek sira inklui fó tratamentu saúde ba povu sira iha Suku Nunira, Postu Administrativu Laga, Munisípiu Baucau ne’ebé foin lalais ne’e mosu konfrontasaun entre grupu Organizasaun Arte Marsiál (GAM) hodi sumu populasaun sira nia uma.
Komandante Lere dehan, ohin loron forsa labele halo de’it treinamentu no han hemu toba iha kuartél, maibé tenke halo treinamentu ajuda povu iha situasaun difisil tuir filozofia “Povu Mak Bee, FALINTIL Maka Ikan”.
“Ezersísiu “Cobra20-2” ida ne’ebé tenke lori haksolok ba ita nia povu, tanba área ne’ebé imi atu ba ne’e foin lalais mosu konflitu, sunu uma, halo povu loron-kalan atu ba toos no kuru bee-moos mós ta’uk. Agora iha Nunira mesak família maka sunu malu, imi nia prezensa la’ós atu hata’uk sira, maibé ba para halo sira hadomi imi no halo sira dame malu,” Lere Anan Timur afirma liuhosi ninia diskursu.
Komandante Jerál F-FDTL lamenta, kazu asaltu ne’ebé akontese iha Aldeia Uasilawa, Suku Nunira, iha loron 13 agostu 2020, rezulta populasaun nia uma 12 hetan sunu, motór ida no karreta ida hetan estragus. Sitasaun ne’e halo povu moris la hakmatek, tanba ne’e, prezensa forsa atu lori fali moris dame ba povu.
Komandante Lere hatutan, foin lalais F-FDTL halo ezersísiu iha área Lia-Ruca-Viqueque, konsege halibur Grupu Organizasaun Arte Marsiál, PSHT, Korka no Kera Sakti hadame malu iha povu nia leet.
Veteranu Rezisténsia tinan 24 ne’e konsidera ezersísiu ne’e sei fó vantajen boot ba membru F-FDTL sira bele aprende iha terrenu hodi aprende prosesu gerrilla ho dixiplina, no aprende esperiénsia foun ne’ebé sira hetan iha terrenu.
Jornalista: Eugénio Pereira
Editór: Francisco Simões
