DILI, 26 outubru 2020 (TATOLI)- Prokuradór Jerál Repúblika (PGR), José Ximenes, rekoñese prestasaun servisu Komisaun Anti-Korrupsaun (CAC) nian iha luta kontra korrupsaun iha Timor-Leste iha mandatu Komisáriu Sergio Hornai nian di’ak tebetebes.
Notísia Relevante : CAC ho PGR hametin liña koordenasaun servisu
“Parabens ba CAC tanba tinan haat ba kotuk CAC kuaze sofre no paradu iha ninia servisu, maibé ho prezensa Dr. Sergio Hornai nian iha ona mudansa servisu signifikativu,” Prokuradór Jerál Repúblika, José Ximenes, hateten liuhosi komunikadu imprensa ne’ebé Agência Tatoli asesu, ohin, hosi CAC.
Nia espera, ba oin komisaun bele hatudu di’ak liu mudansa servisu iha luta prevene no kombate korrupsaun iha Timor-Leste hamutuk ho Ministériu Públiku.
Liuhosi sorumutuk CAC ho PGR José Ximenes ho Koordenadora Gabinete Kombate Korrupsaun Kriminál (GCCC), Lidia Soares, hatudu prontidaun kolabora ho Komisaun iha luta koletiva kombate korrupsaun.
“Saida mak Ministériu Públiku bele ajuda. Odamatan PGR sempre nakloke ba CAC. Ministériu Públiku prontu kualkér horas atu CAC halo konsultasaun. Ita bele halo joint investigation” José Ximenes tenik.
Nia dehan, CAC no MP merese hetan respeita hosi ukun nain no ema hotu nia servisu badinas, instituisaun rua ne’e tenke hatudu servisu badinas no prestasaun.
Notísia Relevante : CAC-TR hametin liña koordenasaun servisu
Jornalista : Nelson de Sousa
Editór : Francisco Simões
