Komisaun Anti-Korrupsaun (CAC), segunda horiseik, halo vizita kortezia no audiénsia ho Prezidente Tribunal Rekursu (PTR), Deolindo dos Santos, iha Edifísiu TR, Caicoli, Dili, ko’alia kooperasaun no hametin koordenasaun servisu. Imajen/CAC

DILI, 06 outubru 2020 (TATOLI)- Komisaun Anti-Korrupsaun (CAC), segunda horiseik, halo vizita kortezia no audiénsia ho Prezidente Tribunal Rekursu (PTR), Deolindo dos Santos, iha Edifísiu TR, Caicoli, Dili, ko’alia kooperasaun no hametin koordenasaun servisu.

Prezensa Komisáriu Sergio Hornai, Komisáriu Adjuntu nain tolu hanesan Augusto Castro, Luis Sampaio no Alexandre Freitas, akompaña ho ekipa iha Edifísiu PRT simu diretamente hosi  Prezidente Tribunál Rekursu (PTR) Deolindo dos Santos.

Objetivu hosi audiénsia CAC nian ne’e atu husu ba PTR halo esplikasaun (explanação)  ruma kona-ba Planu Estratéjiku Komisaun Anti- Korrupsaun (PECAC) tinan 2021-2025.

Biban ne’e, Komisáriu Sergio mós husu disponibilidade PTR nian atu hametin liña koordenasaun servisu mutual entre instituisaun Estadu rua ne’e iha luta koletiva kontra korrupsaun liu-liu kona-ba ezijénsia diploma foun Nu. 7/2020 Medida Prevensaun no Kombate Korrupsaun (MPCC) parte Deklarasaun Rendimentu, Bens no Interese.

Sergio Hornai agradese ba PTR ninia prontidaun atu servisu hamutuk ho CAC kona-ba formatu no maneira Deklarasaun Riku-soin nian ne’ebé Tribunal Rekursu iha esperiénsia durante ne’e hodi simu deklarasaun hosi titular sira nian.

“Lori Komisaun nian naran hakarak hato’o ami ninian obrigadu no agradesimentu ba Sua Exelénsia Prezidente Tribunal Rekursu hodi simu ona ami dadeer ne’e ho objetivu prinsipál, husu ba Sua Exelénsia atu bele halo explanação ruma kona-ba PECAC no deklarasaun riku-soin nian,” hateten Komisáriu CAC, Sergio Hornai, liuhosi komunikadu imprensa ne’ebé Agência Tatoli asesu hosi CAC, ohin.

Explanação ne’e, PTR Deolindo dos Santos, atu hato’o iha diskusaun no avaliasaun Komisaun nian ne’ebé sei realiza iha loron 27, 28, 29 no loron 30 outubru tinan ne’e iha Salaun João Paulo II, Comoro, Dili.

Sergio Hornai informa, daudaun CAC hala’o hela ezersísiu intensiva kona-ba formatu no Standard Operating Procedure (SOP) atu implementa Lei Nu. 7/2020 26 agostu (MPCC), maibé molok implementa diploma foun ne’e, CAC hala’o hela ezersísiu atu rona opiniaun no input hosi peritu nasionál no internasionál.

Liuhosi audiénsia kortezia ida ne’e, tékniku professional instituisaun rua ne’e espera tulun-malu no servisu hamutuk hodi bele hetan formatu ida di’ak iha implementasaun diploma foun MPCC iha parte artigu deklarasaun riku-soin nian.

Komisáriu CAC mós informa ba PTR Deolindo dos Santos katak daudaun ne’e CAC prepara tiha ona formatu deklarasaun riku-soin nian.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here