Komisáriu Komisaun Anti-korrupsaun (CAC), Sergio Hornai ho Komisáriu Adjuntu nain tolu; Augosto Castro, Luis Sampaio no akompaña hosi Diretór Prevensaun no Sensibilizasaun, Rosario de Araujo no Xefe Unidade Investigasaun, Jose Verdial de Carvalho, kinta (22/10), halo audiénsia ho Prokuradór Jerál Repúblika (PGR), José Ximenes, iha Edifísiu PGR, Dili. Imajen/CAC

DILI, 23 outubru 2020 (TATOLI)-Komisáriu Komisaun Anti-korrupsaun  (CAC), Sergio Hornai ho Komisáriu Adjuntu nain tolu; Augosto Castro, Luis Sampaio  no akompaña hosi Diretór Prevensaun no Sensibilizasaun, Rosario de Araujo no Xefe Unidade Investigasaun, Jose Verdial de Carvalho, kinta (22/10), halo audiénsia  ho Prokuradór Jerál Repúblika (PGR), José Ximenes, iha Edifísiu PGR, Dili, ho objetivu    hametin kooperasaun servisu di’ak liu tan entre instituisaun rua.

Sorumutuk ne’e hametin lasu amizade entre instituisaun rua iha luta kontra korrupsaun no mós ko’alia kona-ba diploma foun lei nu. 7/2020  Medida Prevensaun no Kombate Korrupsaun (MPCC).

Parte rua diskute kona-ba lei MPCC ne’ebé mosu fasilita komunikasaun ba aktu krime korrupsaun nian, prevee ba parte autoridade  polisia no judisiais fó importánsia ba aseitasaun ba denúnsia anónima, protesaun identidade ba denunciates no protesaun kontra reprezálias ba denunciate sira.

Komunikadu imprensa ne’ebé Agência Tatoli asesu, ohin, relata katak, Lei MPCC propoin fó dalan atu dezenvolve konjuntu  regra sira para orienta no hatuur disiplina kódigu konduta ajente públiku ho forma atu uza nu’udar padraun ba komportamentu pesoál ba integridade, onestidade, responsabilidade no imparsialidade.

Komisáriu Sergio Hornai mós troka impresaun  ho PGR kona-ba Lei 7/2020 atu halo promosaun publisidade no transparénsia iha prosedimentu ba realizasaun aprovizionamentu, kontratasaun publika ho ninian prosedimentu sira.

Aprovizionamentu no akizisaun iha bens no kontratu servisu sira realiza bazeia ba kritériu ekonómiku no bazeia ba prinsípiu otimizasaun relasaun entre kustu no benefísiu. Nune’e mós fasilita asesu públiku ho autoridade kompetente, ho esperansa prosedimentu administrativu ne’ebé efisiente, efikás, simples no bele mitiga oportunidade sira ba korrupsaun.

Iha diskusaun konstrutiva no produtivu ne’e, Komisáriu mós foka ba partidu polítiku sira tuir Lei foun MPCC, atu halo ezersísiu, promove koñesimentu no konsensializasaun ba kuadru polítiku no militante sira kona-ba risku korrupsaun nu’udar medida ida ba prevensaun korrupsaun nian.

CAC no MP konsidera importante lei MPCC no marka faze fundamental ba Timor-Leste iha luta kontra korrupsaun.

Komisáriu Sergio Hornai, hateten, la’ós iha de’it lei ida no hetan promulgasaun no publikasaun, maibé importante lei MPCC ne’e to’o ba iha sosiedade iha jerál atu koñese, kompriende no bele ezekuta iha nian boa pratika sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here