Prezidente ekipa AD SLB, Kay Rala Xanana Gusmão selebra vitória humutuk ho jogadór sira iha Estádiu Munisipál Dili, domingu ne'e. Imajen TATOLI/Cipriano Colo

DILI, 06 outubru 2019 (TATOLI)–Ekipa AD SLB  halakon Boavista FC Timor iha jogu semi finál Tasa 12 Novembru ne’ebé hala’o iha Estádiu Munisipál Dili, domingu ne’e.

Ekipa AD SLB halakon ekipa Boavista FC Timor ho golu 6:5. Tanba ne’e, AD SLB sei hasoru Lalenok United FC iha finál.

Rezultadu jogu primeira parte entre ekipa AD SLB ho Boavista FC 0:1, iha ne’ebé golu dahuluk a-favór ba Boavista marka hosi jogadór Edit Sávio iha minutu 9.

Iha jogu segunda parte, ekipa AD SLB haka’as-aan hodi hatama mós golu ida liuhusi jogadór Filomeno Junior iha minutu 53 liuhusi penalidade sai impata 1:1.

Ho rezultadu 1:1 ne’e, lori ekipa rua hakat ba penalidade ne’ebe ikus mai sorte monu ba ekipa AD SLB ho skore 6:5.

Hafoin jogu ramata, segundu kapitaun AD SLB, Junior da Costa hateten ekipa ne’e sei mantein ho prinsípiu jogu liliu serbisu hamutuk durante iha kampu laran, sempre rona malu no fiar malu mak lori sira sei hakat to’o finál.

Segundu kapitaun ne’e mós promete lakohi atu halo prezidente ekipa, treinadór, família liliu adeptu sira atu triste, nune’e ekipa ne’e sei luta maka’as iha finál atu sai kampiaun.

Aleinde ne’e, kapitaun Boavista FC Timor, Henrique Wilson da Cruz Martins haklaken maski lakon maibé ‘sportif’ nafatin hodi defende sira-nia klube to’o hotu.

Tuir planu, jogu finál entre ekipa AD SLB ho Lalenok United ba finál Tasa 12 Novembru sei hala’o iha Estádiu Munisipál Dili, sábadu (12 outubru 2019).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here