DILI, 7 jullu 2019 (TATOLI)—Klube istimadu hosi Munisípiu Aileu ne’ebé idéntiku ho Makikit Laulara, AD SLB, fahe pontu hanesan ho ekipa Lalenok United FC liuhusi rezultadu golu 0-0 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, domingu (7/7).

Hanesan baibain, jogu primeira parte hahú, ekipa rua lansa kedas kontra-atake ba malu tuir tékniku ida-idak nian maibé to’o jogu primeira parte terminadu, laiha golu ruma mak akontese.

Kontra-atake entre jogadór AD SLB no Lalenok United iha Estádiu Munisipál Dili. Imajen Tatoli/Hortençio Sanchez

Monu ba segunda parte, ekipa rua esforsa-án buka atu manán liuhusi estratéjia oioin. SLB lansa jogu ofensivu maibé barak liu prefere defensivu. Enkuantu, Lalenok halo jogu ofensivu to’o ramata maibé defeza armada SLB la fó leet ba sira atu marka golu. To’o minutu 90 terminadu, ekipa rua fila ho golu zero.

Jogu refere dirije hosi árbitru Pedro Carvalho, juiz liña António Carvalho, Filomeno da Silva no árbitru rezerva, Jaime Gonçalves.

Tanba fahe pontu ba malu, asistente treinadór SLB, Olandino Alves hateten, iha jogu ne’e sira nia alvu atu manán ho golu ne’ebé mihis maibé la konsege. Nia dehan, dadaun ne’e treinadór prinsipál, Mister King halo hela viajen ba estranjeiru no jogadór prinsipál balun akomuladu kartaun entaun la joga.

“Loloos ami manán duni sira ho golu 1-0 tanba penalidade ne’ebé ohin ami hetan labele xutu ho di’ak. Sorte mak laiha duni,” tenik Olandino.

Tanba ne’e, tuir nia, iha jogu tuir mai sira sei antesipa ho di’ak nune’e bele manán hodi bele halo mudansa ba tabela klasifikasaun.

Iha sorin seluk, treinadór Lalenok United, Yance Matmey hateten, ekipa rua hatudu jogu ne’ebé di’ak tebes maibé sorte mak laiha hodi manán.

“Joga ohin ita haree kapa’as tebes. Ami laduun kontrola bola ho di’ak mak ohin la konsege halo golu maibé iha semana ida ne’e nia laran ami iha jogu balun liuhusi Tasa 12 de Novembro ne’ebé ami sei hasoru Karketu no iha sábadu mós ami sei hasoru Ponta Leste. Ida ne’e ami tenke serbisu maka’as,” dehan Yance.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here