Evolusaun susuk aedes aegypti. Imajen/Espesiál

DILI, 23 outubru 2020 (TATOLI)—Xefe Departamentu Saúde, Cruz Vermella Timor-Leste (CVTL), João Pinto Soares, hateten voluntariu CVTL na’in 32 durante ne’e fó ona apoiu ba Ministériu Saúde hodi sensibiliza informasaun ba uma-kain hamutuk 60.000-resin iha kapitál Dili atu oinsá halo prevensaun ba moras dengue.

“Voluntariu  Kruz Vermella hamutuk 32 sempre la’o  hamutuk ho Ministériu Saúde iha Munisípiu Dili ne’ebé  mak planu tiha ona atu tama sai uma-kain hodi hato’o informasaun kona-ba dengue inklui COVID-19 nian ho uma kain hamutuk rihun 60 resin ,’’ nia dehan ba Tatoli iha ninia servisu fatin, sesta ne’e.

Notísia Relevante :SSMD planea estabelese komisaun prevensaun dengue

Tuir  nia sensibilizasaun informasaun kona-ba moras dengue ne’e improtante  tebes ba komunidade, nune’e sira bele kontribui liuhosi asaun sira hanesan limpeza jerál hodi garante moris iha ambiente saudavel.

”Informasaun sira ne’ebé  mak ita fó ba komunidade ne’e tenki nafatin tanba komunidade ita fó informasaun dala ida sira haluha maibé voluntariu CVTL  hamutuk ho Ministériu Saúde kontinua nafatin la’o no fahe informasaun atu nune’e halo prevensaun antes bainhira udan mai para ema sira ne’e esklaresidu no hatene ona kona-ba moras dengue,” nia dehan.

Tuir observsaun CVTL nian katak husi sensibilizasaun ne’e konsege konvense komunidade balun hodi hamoos daudauk sira-nia bairru no uma hun sira antes udan monu rai iha tempu badak.

”Ita-nia observasaun ba komunidade mak sira komesa hahú hamoos uma ninin sira hakoi lata mamuk sira bainhira udan monu rai,’’ nia informa.

Notísia Relevante :MS Rejista Kazu Dengue Rihun Ida-Resin, Na’in 10 Mate

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here