Susu Dengue.Imajen/TATOLI

DILI,19 Outubru 2020 (TATOLI)—Diretora Saúde Munsípiu Dili, Agostinha Segurado, hateten iha semana ne’e ekipa Saúde Munisípiu Dili, hamutuk ho Autoridade Munisipál no Lokál sei hala’o enkontru ida atu oinsá kria planu asaun hamutuk ba redús kazu moras dengue ne’ebé rejista maka’as iha kapitál Dili.

Tuir relatóriu Servisu Saúde Munisípiu Dili hahú husi fulan-janeiru to’o setembru ne’e rejista totál pasiente dengue hamutuk ema  na’in 808 no hamate ona ema na’in hitu (7).

Notísia Relevante:Durante Fulan Lima, Dengue Hamate Ema Na’in Neen iha Dili

“Agora ita tama ona fulan-outubru udan besik monu rai, tanba ne’e mak Servisu Saúde Munisípiu Dili kontaktu ona ho autoridade lokál no munisipál sira atu realiza enkontru ida hodi halo planu asaun hamutuk iha 21 outubru. Planu asaun ne’e ita tenke aselera iha fulan novembru no dezembru atu bele redús mortalidade ba moras dengue iha minisípiu Dili,” Ezekutiva Servisu Saúde Munisípiu Dili, Agostinha Segurado ba Jornalista Tatoli iha ninia kna’ar fatin Caicoli Dili, (19/10).

Diretora ne’e anunsia katak, dadus estatístika hatudu, iha tinan ida ne’e moras dengue aas tebes, tanba ne’e parte servisu saúde hamutuk ho autoridade lokál sira halo hela preparasaun ba prevensaun dezde fulan-agostu liuliu haree  liubá área risku.

Ekipa Servisu Saúde Munisípu Dili mós durante ne’e sempre aviza ba komunidade sira tama sai bairru iha Dili laran, oinsá fó hanoin nafatin ba família sira atu buka hadook aan husi moras dengue, liuhosi hamoos ambiente uma nian, tanba risku boot liu mak iha tempu udan.

”Ita mós husu ona apoiu ba ekipa Cruz Vermella Timor-Leste (CVTL) atu tama direta iha kada uma kain hodi fó hatene ba família sira, tenki hamoos uma ninin bainhira udan monu rai,” nia hateten.

Nia fó ezemplu katak, tenke hakoi lata at sira no tenki hamoos vazu ai-funan sira, atu nune’e udan monu rai bee labele nalihun iha fatin sira ne’e.

Notísia Relevante:MS Rejista Kazu Dengue Rihun Ida-Resin, Na’in 10 Mate

Jornalista:Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here