Pesoal husi Ministeriu Saude rega hela aimoruk dengue tama sai bairo no uma komunidade nia iha area Comoro 11 Fevereiru 2017.Foto:ANTIL

DILI, 21 maiu 2020 (TATOLI)-Tuir dadus husi Servisu Saúde Munisípiu Dili fó sai katak hahú fulan-janeiru to’o meadu maiu 2020, nia parte rejista kazu moras dengue hamutuk 706, maibé na’in neen la konsege salva sira-nia vida.

Alende moras dengue, Servisu Saúde Munisípiu Dili mós rejista moras Infesaun Vias Respiratoria ka ISPA durante fulan-abríl hamutuk 10.897, moras kulit hamutuk 1.557, inklui diaréa 1.483.

Diretóra Servisu Saúde Munisípiu Dili, Agostina Segurado, informa husi relatóriu ne’ebe relata pasiente ne’ebé maka mate ne’e mesak labarik husi tinan 11 mai kra’ik.

”Ita kontinua la’o ho ai-moruk fomigasaun ba fatin ne’ebé mak afetadu sira aleinde de COVID-19, ita mós sosializa kazu dengue nian,” dehan nia ba Jornalista sira iha ninia servisu fatin, kinta ohin.

Atu hasa’e koiñesementu komunidade iha Dili hodi halo prevensaun maka Servisu Saúde Munisípiu Dili kontinua sensibiliza informasaun ba públiku liuhosi meiu informasaun  no avizu sira.

”Kona-ba aimoruk fomigasaun ita sei sufisiente nafatin no atividade ne’e mós la’o nafatin ezemplu ha’u kompara fulan kotuk ho fulan agora moras dengue iha númeru ne’ebé redusaun tebes,”nia subliña.

Nia realsa tan durante fulan-maiu kazu dengue hahú menus iha sentru saúde no ospitál Nasionál Guido Valadares Dili.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here