Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 19 outubru 2020 (TATOLI)- Diretór Ezekutivu Asosiasaun Halibur Defisiénsia Matan (AHDM), Gaspar Afonso,  hateten tuir dadus organizasaun nian relata sidadaun ho defisiénsia matan iha Timor-Leste hamutuk 38.118 no husi númeru ne’e ema na’in 14.828 ho problema matan ne’ebé labele kura.

Nia esplika defisiénsia matan iha territóriu ho tipu ne’e oioin balun moris mai sofre nanis, balun hetan asidente no mós balun tanba  dezástre.

Notísia Relevante :Defisiénsia rihun 25 seidauk asesu edukasaun

“Ida ne’e problema lubuk ida, entaun iha tratamentu  ne’e balun rekopera no balun labele rekopera. Hanesan ami sira ne’e, labele rekopera ona tanba ami la’ós tama iha tipu matan katarata’’, diretór AHDM esplika asuntu ne’e ba ajénsia TATOLI iha kna’ar fatin Manleuana, Dili sesta (17/10).

Kona-ba maluk defisiénsia matan sira ne’ebé la’ós tama iha tipu katarata, Gaspar Afonso, informa Sentru Matan Nasionál entrega ba AHDM, la’ós atu halo tratamentu ba sira, maibé fó treinamentu no halo kapasitasaun nune’e iha korajen atu hala’o moris ne’e hanesan mós ho sidadaun normal sira seluk.

“Ami nia moto maka “bainhira iis sei iha ita sei hakat ba oin hodi hasoru dezafíu no obstákulu oioin. La signifika, ema ne’ebé labele haree maka bele hetan difikuldade no dezafíu, maibé ema ne’ebé matan di’ak mós sempre hasoru dezafiu oioin. Entaun, ita labele hakfodak no labele tauk ba moris ne’e”, nia enkoraja.

Oras ne’e daudaun, AHDM fó hela formasaun ba ema ho defisiénsia matan hamutuk na’in 56, sira aprende kona-ba letra braille, bainhira hatene ona mak bele kontinua sira nia estudu.

“Ita mós serbisu hamutuk ho Ministéru Edukasaun, iha Diresaun ida naran Ensinu Rekorente hodi haruka sira ba ne’ebá atu tuir eskola. Iha eskola ne’e iha level primária, no pré-sekundáriu. Ministériu Edukasaun promete mós  katak, tinan oin sei iha level sekundáriu”, Gaspar Afonso esplika.

Notísia Relevante :Governu esforsu atu haree ema ho defisiénsia iha aspetu hotu

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here