Ema ho defisiénsia sira, simu negosiadór prinsipál fronteira maritima Kay Rala Xanana Gusmão. Imajen/ António Goncalves

DILI, 07 agostu 2020 (TATOLI)–Diretór Nasionál ba Protesaun Direitu ba Ema ho Defisiénsia (DNPDED, sigla portugés), Matias da Silva, hatete Governu esforsu atu haree ema ho defisiénsia iha aspetu hotu-hotu ba dezenvolvimentu, asesu ba edukasaun, saúde, no asesu ba servisu. 

Notísia Relevante: Tinan 2019, Governu apoiu $372-resin ba organizasaun defisiente sira

“Ita esforsu atu ita-nia ema ho defisiénsia mós tenke asesu ba aspetu hotu-hotu, nune’e mós asesu ba edukasaun, saúde inklui asesu ba servisu nian,” dehan Matias da Silva, ba Agência TATOLI iha nia knaar fatin MSSI Caicoli, Dili, kinta ne’e. 

Nia hatutan, DNPDED hahú hanoin no prosesu hela atu halo konsultasaun foun ho liña Liña ministeriál hotu ba iha periódu 2020-2024 nian, katak implementa ona planu asaun polítika nasionál ba ema ho defisiénsia.

Tuir politika, nia dehan, atu estabelese konsellu nasionál ho nia knaar mak halo monitorizasaun no avaliasaun, no garante katak iha opurtunidade ne’ebé mak hanesan no goza sira-nia direitu ba ema ho defisiénsia iha Timor-Leste.

“Tanba ema seidauk iha konesementu di’ak entaun sira haree ba ema ho defisiénsia ne’e katak buat hotu aat. Ita bele dehan seidauk valoriza ema ho defisiénsia no trata ema ho defisiénsia ne’e seidauk másimu,” nia dehan. 

Nia informa, iha 2014-2018 ne’e halo planu asaun la’o la dún di’ak tanba hahú hosi prosesu konsultasaun hodi hamosu planu asaun ne’ebé nia implementasaun ladún iha efetivu

Maibé, nia dehan, tanba iha tinan 2012 iha ona polítika nasionál ba ema ho defisiénsia liuhosi rezolusaun Governu ho númeru 14/2012 aprova ona entaun bele ona fó kbiit ba Governu bele hamosu ona planu asaun ida.

Bazeia ba palanu asaun ne’e, nia hateten, DNPDED halo beibeik sonsibilizasaun no monitoriza depois mak hato’o ba instituisaun Governu sira hotu katak ema ho defisiénsia mós sidadaun rai ne’e nian.

“Tanba ne’e mak ohin ha’u dehan seidauk iha planu asaun ne’ebé mak efetivu tanba iha primeiru periódu ladún halo konsultasaun ho munisipál no liña ministeriál sira no falta rekursu hosi bele halo planu asaun ba ema ho defisiénsia,” nia dehan. 

Agora iha periódu daruak, nia haktuir, mosu stering committee entaun ita komesa ona halo planu ba asaun. Tanba, tuir nia, iha ona ema balu ne’ebé mak oferese nia-aan hodi bele lidera no hanoin halo planu atu oinsá mak ema ho defisiénsia sira mós moris hanesan ema baibain sira. 

Nia hateten, polítiku I Governu Konstitusionál mai to’o agora, polítika Governu ne’e kontinua firme katak bazea ba konstituisaun RDTL nian, iha artigu 21 ho 16 ne’e, ko’alia kona-ba direitu no obrigasaun nu’udar defisiente iha Timor-Leste, no universalidade ba igulaidade iha artigu 16 katak sidadun hotu tenke trata hanesan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here