Ministru Edukasaun Juventude no Desportu, Armindo Maia. Imajen/Egas Cristovão

DILI, 10 agostu 2020 (TATOLI)-Baseia ba dadus sensu uma-kain 2015 rejista sidadaun ho kondisaun defisiénsia iha Timor-Leste hamutuk 38,118, maibé husi númeru ne’e ema rihun 25 maka seidauk asesu ba edukasaun.

Ministru Edukasaun Juventude no Desportu (MEJD), Armindo Maia, hateten Governu liuhosi MEJD sei servisu hamutuk ho Asosiasaun Defisiénsia Timor-Leste (ADTL) hodi reforsa programa edukasaun inkluziva ba sidadaun ho defisiénsia sira iha TL ba futuru.

Notísia Relevante :Governu esforsu atu haree ema ho defisiénsia iha aspetu hotu

Armindo Maia, hato’o asuntu ne’e hafoin halo sorumutu ida ho Asosiasaun Defisiénsia Timor-Leste iha edifísiu MEJD Vila-Verde Dili, segunda ne’e.

Durante ne’e, Governu enfrenta dezafiu lubuk ida hanesan rekursu umanu no fasilidade hodi implementa programa edukasaun inkluzivu ba ema ho kondisaun defisiénsia.

“Ami nia esforsu durante ne’e oinsá buka meius atu apoiu ema ho defisiénsia sira bele asesu ba edukasaun tuir nesesidade ema ho defisiénsia sira-nian,”dehan Governante.

“Ita foin mak iha ema ne’ebé espesialista ba tradúz lian jestuál ne’e hamutuk na’in tolu de’it, entaun ita presija investe hodi loke tan formasaun atu bele aumenta númeru ne’e,”tenik Armindo Maia.

Notísia Relevante :Eufrasia de Menezes, Tradutora Lian Jestuál ba Ema ho Defisiénsia

Ba futuru, nia dehan sei estabelese kooperasaun ho ADTL hodi reforsa polítika ba programa edukasaun inkluziva iha Timor-Leste.

Iha biban hanesan Diretór Ezekutivu ADTL, Cesário da Silva, hateten durante enkontru husi parte Governu nian husu ba ninia organizasaun atu hametin liután koordenasaun servisu ho diresaun relevante sira.

Purezemplu ida maka defisiénsia tilun presiza tradutór lian jestuál, defisiénsia matan presiza ema espesialista ba letra espesifiku sira nune’e defisiénsia labele lakon diretu ba eskola.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here