Komísariu CAC, Sergio Hornai. Imajen/António Gonçalves

DILI, 14 outubru 2020 (TATOLI)—Komisáriu Comissão Antí Corrupção (CAC), Sérgio Hornai, ofisialmente haruka ona karta ba Ministru Justisa, Manuel Cárceres, atu-bele halo tradusaun ba Lei Medida Prevenção Combate Corrupção (MPCC) ba lian Tetun.

Notisia Relevante: PN-Governu presiza serbisu hamutuk apoia CAC implementa lei MPCC

“Hafoin promulgasaun lei ne’e, ha’u ofisialmente haruka ona surat ba señor Ministru Justisa, daudaun ne’e halo hela servisu namanas. Tradusaun mínimu ita iha lingua ofisiál rua. Lei ne’e emitidu iha língua portugés, agora atu halo tradusaun tetun, agora posivelmente prodús iha língua traballu, tantu lian inglés ka lian traballu nian,” Komisáriu CAC ne’e informa ba jornalista sira, iha edifísiu CVTL, Bairro Grilhos, Suku Grincenfor, Dili, kuarta ne’e.

Entretantu iha loron 09 setembru 2020 liubá, Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, husu Governu atu halo tradusaun ba lei MPCC nune’e sosiedade hotu-hotu bele komprende didi’ak lei ne’e iha implementasaun.

João Boavida fundamenta, kestaun boot ba finalidade komprensaun timoroan hotu-hotu ba lei MPCC ne’e tanba ho versaun portugés,

“Ha’u hanoin tenke halo tradusaun ba tetun nune’e lei MPCC ne’e iha versaun Tetun nune’e ema hotu bele komprende didi’ak lei. Razaun seluk mak maioria timoroan ko’alia Tetun, tanba ne’e ita husu atu lei ne’e iha versaun Tetun,” Diretór CEPAD ne’e informa ba jornalista sira, iha nia kna’ar-fatin, Bidau, Dili, kuarta ne’e.

Diretór CEPAD fó hanoin ne’e nune’e implementasaun lei la’o ho di’ak no ema hotu komprende lei ne’e tanba lei ne’e importante ba sosiedade tomak.

“Enkuantu versaun Tetun seidauk iha no seidauk la’o tuir sosializasaun kle’an iha orgaun soberanu ida-idak ba setór privadu, sosiedade sivil no komunidade tomak perguntas mak ne’e lei ne’e sei hetan ninia implementasaun efetivu ka lae,  hanesan CEPAD bele halo sosializasaun ba lei ida-ne’e. Maibé, ida-ne’e de’it sei la to’o tanba lei aprovadu ona hein de’it atu implementa,” nia dehan. 

Nia hatutan, dalaruma iha CAC sira barak mós sei kestiona ida-ne’e tanba ho versaun Portugés, entaun presiza iha versaun Tetun nune’e investidagór labele hasoru difikuldade.

“Imi (mídia) Mos tenke kestiona tanbasá mak lei ida-ne’ebé importante no sensitivu ba futuru interese povu nian, maibé mai ho lian Portugés  de’it”, nia fó hanoin.

Diretór CEPAD ne’e fó ezemplu, iha Timor-Leste lian ofisiál mak dalen Tetun no Portugés maibé maioria timoroan hatene mak Tetun la’ós Portugés.

“Iha kontekstu Timor prezente  ema 5% mak ko’alia Portugés iha 95% la ko’alia portuges, entaun lei ida-ne’e no inklui lei sira seluk tenke ho lian Tetun nune’e ema hotu bele hatene,” nia hateten. 

Diretór CEPAD ne’e fó hanoin ba instituisaun relevante atu kualkér lei saida de’it tenke iha versaun Tetun, nune’e sosiedade mós bele akompaña ninia implementasaun.

Notisia Revante: CEPAD husu Governu tradús lei MPCC ba dalen tetun

Jornalista: Evaristo Soares Martins

Editór: Cacncio Ximenes  

HAKEREK NO HATÁN

Please enter your comment!
Please enter your name here