Diretór Ezekutivu CEPAD, João Boavida. Imajen Tatoli/Egas Cristóvão

DILI, 09 setembru 2020 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, husu Governu atu halo tradusaun ba lei Medida Pevensaun no Kombate Korrupsaun (MPCC-sigla potugés) hosi dalen portugés ba dalen tetun, atu nune’e sosiedade hotu-hotu bele komprende didi’ak lei ne’e iha implementasaun.

Notísia Relevante: Lei MPCC obriga jestór setór públiku-privada ezekuta OJE ho fuan moos

João Boavida fundamenta, kestaun boot ba finalidade komprensaun timoroan hotu-hotu ba lei MPCC ne’e tanba ho versaun portugés,

“Ha’u hanoin tenke halo tradusaun ba tetun nune’e lei MPCC ne’e iha versaun Tetun, nune’e ema hotu bele kompriende didi’ak lei ne’e. Razaun seluk mak maioria Timoroan ko’alia Tetun tanba ne’e ita husu atu lei ne’e iha versaun Tetun,” Diretór CEPAD ne’e informa ba jornalista sira, iha nia kna’ar-fatin, Bidau, Dili, kuarta ne’e.

Diretór CEPAD fó hanoin, enkuantu versaun tetun seidauk iha no seidauk la’o tuir sosializasaun kle’an iha orgaun soberanu ida-idak ba setór privadu, sosiedade sivil no komunidade tomak, perguntas mak ne’e lei ne’e sei hetan ninia implementasaun efetivu ka la’e.

Tuir nia, CEPAD bele halo sosializasaun ba lei ida-ne’e maibé ida-ne’e de’it sei la to’o tanba lei aprovadu ona hein de’it atu implementa. 

Nia hatutan, dalaruma iha CAC sira barak mós sei kestiona ida-ne’e tanba ho versaun portugés, entaun presiza iha versaun tetun nune’e investidagór labele hasoru difikuldade.

“Imi (mídia) Mos tenke kestiona tanbasá mak lei ida-ne’ebé importante no sensitivu ba futuru interese povu nian, maibé mai ho lian portugés  de’it,” nia fó hanoin.

Diretór CEPAD ne’e fó ezemplu, iha Timor-Leste lian ofisiál mak Tetun no Portugés maibé maioria Timoroan hatene mak Tetun la’ós portugés.

“Iha kontekstu Timor prezente  ema 5% mak ko’alia portugés, iha 95% la ko’alia portugés. Entaun lei ida-ne’e no inklui lei sira seluk tenke ho dalen tetun nune’e ema hotu bele hatene,” nia hateten. 

Diretór CEPAD ne’e fó hanoin ba instituisaun relevante katak kualkér lei saida de’it tenke iha versaun Tetun nune’e sosiedade mós bele akompaña ninia implementasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here