Prezidente TLPU, Manuel Pinto.

DILI, 13 outubru 2020 (TATOLI) – Asosiasaun jornalista Timor – Leste Press Union (TLPU)  firme iha nia pozisaun hodi hamriik iha “liña frente” hamutuk ho entidade Estadu sira no komponente hotu-hotu iha Timor-Leste luta kontra notísia falsa.

Notísia Relevante : CI komprometidu koopera ho jornalista luta kontra notísia falsa

Prezidente TLPU Manuel Pinto atuál prezidente interinu Agência Noticiosa TATOLI.IP,  afirma, notísia falsa laiha fatin atu eziste iha Timor –Leste. Tanba ne’e mak TLPU koopera ho Governu no ajente internasionál sira hanesan Embaixada Estadus Unidus Amerika (EUA) nian iha Timor – Leste hodi luta kontra notísia falsa ne’e.

“Semináriu ida-ne’e atu hanesan parte ida TLPU hodi marka ninia pozisaun hodi hatete katak notísia falsa ka notísia bosok ne’e laiha fatin para eziste iha Timor – Leste, nune’e mak TLPU hanesan sombriña ba Jornalista sira sai kedan ajente ne’ebé mak fahe informasaun, entaun atu fahe informasaun ruma tenke verifika uluk mak foin bele fó sai,” afirma Manuel Pinto, ohin, ba jornalista sira iha JL Vila, Fatuhada, Dili.

Nia dehan, bainhira  jornalista iha kapasidade hodi halo analiza no verfikasaun ba notísia antes públika sei la mosu tan notísia falsa.

“Jornalista nia papél mak kada minutu, kada oras no kada loron hakerek notísia. Se jornalista laiha koñesimentu atu halo analiza, peskiza no identifika ne’e hanoin laloos ona. Ho nune’e mak TLPU halo semináriu ida-ne’e nu’udar parte ida kontinuasaun hosi ita nia maluk ida Jornalista Raimundos Oki ne’ebé hetan fiar hodi ba partisipa formasaun ida iha Amerika kona-ba oinsá mak atu halo verifikasaun ba faktu ho baze plataforma internet nian,” nia hateten.

Prezidente TLPU ne’e relata tan, semináriu ne’e sei la hotu to’o iha ne’e, maibé sei kontinua nafatin ba oin oinsá mak promove nafatin jornalizmu ida ne’ebé ho étika.

Notísia Relevante : EUA apoiu jornalista TL luta kontra notísia falsa

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here