Embaixadora EUA iha Timor-Leste, Kathleen Fitzpatrick. Imajen Tatoli/António Goncalves

DILI, 13 outubru 2020 (TATOLI) – Governu Estadu Unidu Amerika (UEA) liuhosi nia embaixada iha Timor-Leste kontinua fó ba apoiu ba Timor-Leste liuhusi área oin-oin, inklui apoia jornalista timor-oan sira, oinsá hamutuk luta kontra notisia falsa ka fake news ka hoax.

Kompromisu apoia ba liberdade imprensa iha TL ne’e Governu EUA hatudu kedas dezde Timor-Leste restaura nia ukun rasik-an iha 20 maiu 2002 to’o mai ohin loron, liuhosi hodi fó apoiu kapasitasaun ba jornalista timor-oan, no mós fó apoiu ba órgaun komunikasaun sosiál sira ne’ebé eziste iha TL.

Iha prosesu mundu  imprensa luta kontra notísia falsa ka fake news ka hoax, Estadu Unidu Amerika (EUA) kontinua hatudu nia prontidaun hodi apoia jornalista timor-oan sira, liuhosi asosiasaun jornalista sira, Timor-Leste Press Union (TLPU) no Asosiasaun Jornalista Timor-Leste (AJTL) atu oinsá mak transmite koñesimentu no abilidade hosi peritu sira oinsá mak luta nafatin kombate notísia falsa.

Embaixadóra Estadu Unidu Amerika (EUA) iha Timor-Leste, Kathleen Fitzpatrick hateten, EUA apoiu liberdade imprensa no espresaun iha Timor-Leste Tanba ne’e sira-nia parte apoiu jornalista timor-oan hotu atu luta kontra no kombate notísia falsa.

“Ami kontente tebes ho formasaun ne’ebé kria hosi Timor-Leste Press Union ba jornalista sira kona-ba luta kontra notísia falsa. Ami Estadu Unidu liberdade imprensa no espresaun ne’e mak importante tebes,” Embaixadora Kathleen Fitzpatrick dehan iha nia palestra iha lansamentu treinamentu luta kontra notísia falsu  ne’ebé organiza husi TLPU, ohin, iha salaun JL Vila, Fatuhada, Dili.

Formasaun ne’e partisipa husi jornalista timor-oan na’in 20 mai husi órgaun komunikasaun  sosiál kompostu hosi TATOLI, I.P, Suara Timor Lorosa’e Coorporation (STL CORP), Oé-Cusse Post online, Timor Post, S.A, RTTL. EP no Loluwairi online.

Embaixadóra Kathleen Fitzpatrick, afirma bá-oin EUA nafatin apoiu atividade saida de’it mak jornalista sira halo hodi kontra notísia falsu.

“Ami apoiu profisionalizmu jornalista timor-oan sira oinsá  mak bele halo identifikasaun ba informasaun ne’ebé falsa, oinsá mak bele verifika no analiza informasaun ne’ebé loos no la loos,” nia hateten.

Jornalista: Hortencio Sanchez

Editór: Francisco Simões

HAKEREK NO HATÁN

Please enter your comment!
Please enter your name here