Diretora Ezekutiva Laboratoriu Nasional Endang Soares da Silva. Imajen /Egas Cristovão

DILI, 13 outubru 2020 (TATOLI)-Baseia ba diploma konjunta ministeriál númeru 34/MF no MS 09/2020, 07 outubru aplika ona tarifa ba sidadaun Timoroan no estranjeiru ne’ebé maka hakarak halo amostra ba COVID-19 ho objetivu atu hetan sertifikadu médiku nian obrigatóriu tenki selu ho valór osan husi $ 35 to’o $ 120.

”Baseia ba publikasaun iha Jornál Repúblika ba diploma Ministeriál konjunta ho númeru 34 / MF no MS /09 /2020 07 de outubru ba tarifa teste diagnóstiku ba surtu COVID-19,” dehan Diretora Laboratóriu Nasionál, Endang Soares, ba Tatoli iha ninia servisu fatin, tersa ne’e.

Notísia Relavante :Laboratóriu Nasionál kada loron halo teste ba suspeitu COVID-19 na’in 90

Nia dehan tarifa ne’e la’ós aplika ba ema hotu-hotu maibé aplika de’it ba sira ne’ebé maka hakarak hetan sertifikadu médiku hodi deklara livre husi COVID-19 para fasilita sira-nia viajen ba rai-liur.

”Tarifa ba teste ne’e ami halo diferensia ba rile-time PCR (polymerase chain reaction) ho nia kustu $ 35 ho durasaun teste to’o rona rezultadu iha oras 48 to’o 72 oras másimu loron tolu, Rapid PCR ka GeneXpert no PCR AustDiagnostic ho nia kustu $40 ho durasaun teste oras  24 to’o 48,” nia hateten.

Nune’e mós polymerase chain reaction (PCR) biofire ho durasaun oras 24, ho presu $ 120, tarefa ida ne’e sei fó de’it prioridade ba kazu urjente no kada loron Laboratóriu Nasionál iha kapasidade atu atende de’it ema na’in 10.

Enkuantu, Timoroan no ema estranjeiru ne’ebé maka tama iha territóriu Timor-Leste sei la aplika tarefa ne’e bainhira mosu sintoma COVID-19 no presiza atu halo teste laboratóriu tanba Estadu implementa hela kuarentena obrigatóriu no auto-kuarentena hodi prevene no kombate transmisaun COVID-19 iha rai-laran.

”Ami halo kalkulasaun baseia ba kustu eletrisidade, reazentes sira ne’e, ami aplika ida ne’e ba ema ne’ebé mak viajen ba estranjeiru de’it la’ós tama mai Timor-Leste,” tenik ezekutiva.

Notísia Relavante :Laboratóriu Nasionál Iha Kapasidade Halo Teste ba Amostra 72 Kada Loron ba Kazu COVID-19

Jornalista : Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here