Coronavirus

DILI, 16 abríl 2020 (TATOLI) – Koordenadór ba Ekipa Estudu no Análiza Risku iha Sentru Integradu ba Jestaun Krize (CIGC, sigla portugés), Francisco Guterres, informa kapasidade laboratóriu Nasionál bele ona halo teste amostra raan ba kazu COVID-19 kada loron hamutuk 72.

“Ita-nia Laboratóriu Nasionál agora daudaun konsege ona halo teste amostra raan ba kada loron 72, ne’ebé uluk ita halo teste 12, agora sa’e ona ba 72 kada loron. Ita espera katak ekipamentu foun kuandu tama mak ita bele hasa’e teste amostra ba 300 ba kazu COVID-19 kada loron”, tenik durante halo aprezentasaun iha plenária estraordinária kona-ba prevensaun no kombate surtu COVID-19 no ezekusaun deklarasaun Estadu Emerjénsia, iha Parlamentu Nasionál, kinta ne’e.

Nia adiata, kuandu kada loron bele halo ona teste amostra raan ba pesoál na’in-300, maka sei bele halo teste amostra raan ba abitante sira iha kuarentena no sidadaun sira ne’ebé fila husi nasaun afetadu sira.

“Ita fásil ona bele halo teste ema sira ne’ebé fila husi nasaun afetadu sira, maski liu ona loron 14 mos ita bele halo teste amostra bainhira mosu sintoma ruma ba COVID-19 no buka tuir sira nia kontaktu ho família hodi halo teste hotu”, eis Sekretáriu Estadu ne’e akresenta.

Ho nune’e, nia relata daudaun Laboratóriu Nasionál iha kapasidade atu halo teste amostra raan ba ema-sira ne’ebé suspeitu ba COVID-19, maibé CIGC mós kontinua buka meiu atubele uza tan laboratóriu rezerva hodi prepara to’oo senáriu piór liu ba propagasaun COVID-19 iha Timor-Leste.

“Ami sei husu laboratóriu Univercidade Nacional Timor Lorosa’e (UNTL) iha Hera atu sai hanesan laboratóriu rezerva, nune’e bainhira mosu senáriu aat liu ona mak bele uza laboratóriu UNTL hodi ajuda halo teste”, nia akresenta.

Antes ne’e, Governu liuhosi Ministériu Saúde kuarta (25/03) lansa mós projetu konstrusaun sala laboratóriu patolojia no mikrobolojia iha Ospitál Nasionál Guido Valadares (HNGV, sigla portugés), hodi halo teste ba kazu Coronavírus.

Obra ne’e lansa diretamente hosi eis Vise Ministra Kuidadu Saúde Primária, Élia dos Reis Amaral ho parseiru sira no obra ne’e gastu orsamentu rihun $ 350.

Diretóra Laboratóriu Nasionál, Endang Soares, hateten laboratóriu ne’e sei fasilita HNGV atu halo teste ba COVID-19, tanba durante ne’e Ministériu Saúde tenke haruka amostra hosi suspeitu Coronavírus ba teste iha ospitál Darwin Austrália.

Laboratóriu foun ne’e sei reforsa servisu Laboratóriu Nasionál hodi halo teste ba suspeitu COVID-19 bainhira kazu kontinua aumenta maka’as iha Timor- Leste.

Projeitu ne’e implementa hosi Kompaña RMS ho Menzies ho durasaun fulan-tolu, hahú marsu to’o junu 2020.

Orsamentu ba obra ne’e, Ministériu Saúde hetan apoiu hosi Menzies School of Research Darwin, Governu UK no Governu Austrália.

Menzies School of Research Darwin mós sei apoiu fó formasaun rekursu umanu ba pesoál laboratóriu liliu iha área mikrobiolojia no seluk tan.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here