MInistru Edukasaun Juventude no Desportu, Armindo Maia. Imajen Tatoli/Egas Cristovão

DILI, 13 outubru 2020 (TATOLI)-Ministériu Edukasaun Juventude no Desportu (MEJD) iha ona planu ba futuru sei prepara tékniku hodi halo operasaun no manutensaun ba mákina Sentru Imprime Ministériu nian iha área Comoro Dili.

Governu Korea maka oferese Sentru Imprime iha Comoro ne’e ba Ministériu Edukasaun iha tinan hirak liubá maibé kuaze tinan rua ona la funsiona “abandona” tanba laiha tékniku atu halo operasaun no mós manutensaun.

Notísia Relevante :MEJD kontrata Sylvia imprime matéria ezame nasionál

“Ita labele nafatin tinan bai-loron depende beibeik ba tékníku sira husi liur, ita buka dalan oinsá bele iha ona tékniku espesializada ba área sira ne’e,” dehan Ministru Edukasaun Juventude no Desportu Armindo Maia, ba jornalista sira iha Ministériu Finansa Ai-tarak-Laran Dili, segunda ne’e.

Ba oin, Governante ne’e dehan sei fó formasaun ba funsionáriu sira atu oinsá halo operasaun ba mákina ne’e no mós manutensaun bainhira mákina ne’e hetan avaria.

Tuir loloos matéria ezame nasionál ba estudante finalista ensinu báziku, ensinu sekundária no tékniku profesionál imprime iha Sentru Imprime MEJD nian, maibé laiha tékniku no mákina balun iha problema tanba tinan rua ona la halo manutensaun.

Ho kestaun ne’e  tékniku ne’e maka obriga Governu loke konkursu públiku no ikus mai kompañia Sylvia maka manán konkursu hodi imprime matéria ezame nasionál ba estudante finalista tinan letivu 2020 nian.

Nia hateten durante  ne’e Governu uza hela tékniku husi Korea hodi halo operasaun ba mákina ne’e, maibé agora la funsiona tanba tékniku sira fila ona ba sira-nia nasaun orijen relasiona ho pandemia globál COVID-19.

Notísia Relevante :Sylvia sei finaliza prosesu impresaun matéria ezame nasionál iha novembru

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here