Ministeriu Edukasaun Juventude no Desportu asina kontratu ho Kompania Silvia Dili hodi imprime materia ezame nasional.Imajen/Jogerjo Guterres.

DILI, 09 outubru 2020 (TATOLI)-Governu liuhosi Ministériu Edukasaun Juventude no Desportu (MEJD) sesta ne’e, selebra kontratu ho Kompañia Sylvia Xerox Dili hodi imprime pontus ezame nasionál  no diploma estudante finalista iha tinan ne’e.

Projetu ne’e, MEJD gasta orsamentu Estadu hamutuk rihun $385.109.

Hafoin asina kontratu ne’e, Ministru Edukasaun Armindo Maia, entrega kedas file eletróniku kona-ba matéria ezame nasionál kompostu husi estudante eskola ensinu báziku, sekundáriu no tékniku vokasionál ba Kompañia Silvia Dili hodi hahú imprime.

Tuir kontratu iha sábadu (10/10), kompañia sei komesa ona prosesu impresaun matéria ezame nasionál.

Ministru Armindo Maia, husu ba kompañia atu servisu ho responsabilidade hodi garante no asegura konfedensialidade ba matéria ezame nasionál atu labele espalla iha públiku.

“Ha’u husu ba ita bo’ot sira atu nafatin asegura seguransa ida di’ak ho konfedensialidade tanba imi-nia servisu mak sei determina labarik sira nia futuru,” dehan Governante iha salaun VIP MEJD, Vila Verde Dili.

Projetu ne’e la’ós ajudikasaun direta maibé MEJD halo konkursu públiku no ikus mai kompaña Sylvia maka manán.

Governante ne’e hateten bainhira matéria ezame nasionál espalla iha públiku la’ós de’it responsabilidade MEJD nian maibé inklui Kompaña vensedór nian hotu.

Iha biban hanesan Jestór Kompañia Sylvia Dili, Moises Amaral, promete sei servisu ho responsalblidade hodi asegura seguransa ida másimu liu durante prosesu imprimisaun pontus ezame nasionál.

“Ami sei kria regra ida rigorozu sei prodúz uluk billete identidade ba pesoal ne’ebé de’it mak hetan autorizasaun bele asesu iha proseu imprimisaun ne’e tantu husi MEJD inklui parte Kompañia nian rasik atu nune’e ami bele kontrola durante prosesu ne’e la’o,” nia dehan.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here