Prokuradór Jerál Repúblika, José Ximenes. Imajen Tatoli /Egas Cristovão

DILI, 08 outubru 2020 (TATOLI)-Prokuradór Jerál Repúblika (PGR), José Ximenes, ohin, iha Dili,  informa, Ministériu Públiku (MP) kontinua halo hela investigasaun  ba falsifikasaun lista veteranu “falsu” 500-resin  ne’ebé Ministériu ba Asuntu Kombatente Libertasaun Nasionál (MCLN) enkamiña   ba PGR.

Notísia Relevante : Lista veteranu falsu na’in-500-resin ba ona Ministériu Públiku

“Prosesu investigasaun la’o hela,  portantu ha’u labele fó sai lai,”  hateten PGR José Ximenes, hodi responde Agência Tatoli.

Ministériu ba Asuntu Kombatente Libertasaun Nasionál (MCLN)   haruka lista falsifikasaun  veteranu  hirak ne’e  iha indísiu hodi  falsifika sai veteranu simu pensaun hosi Estadu.

 José Ximenes, la esplika detallu kona-ba númeru prosesu hira mak  aprezenta ona ba Tribunál iha ona desizaun no balun kontinua iha prosesu inkéritu. Maibé, PGR José Ximenes, fó hanoin katak,  balun hetan ona kondenasaun ne’ebé Tribunál fó sai no balun sei prosesu investigasaun kriminál ho balun diresaun kombate korrupsaun kriminalidade mak ka’er prosesu iha nivel distritál la’o hela.

Nia adianta, sei informa dadus loloos iha enkontru mensal ho Prezidente Repúblika (PR), Francisco Guterres ‘Lú Olo’ iha tempu tuir mai.

Prokuradór Jerál Repúblika, José Ximenes dehan, iha prosesu inkéritu MP nian  nota iha problema boot iha verifikasaun dokumentu, durante ne’e, nune’e akontese situasaun sira-ne’e.

Nia husu presiza reforsa iha nivel verifikasaun ho  responsabilidade ba ministériu tutela atu hasai dokumentu ruma tenke verifika didi’ak no ema ne’ebé verifika tenke iha integridade hodi  labele inventa hodi ‘bosok’  iha komisaun.

“Ha’u hanoin prosesu verifikasaun ne’e tenke liuhosi etapa ida ba rua ka tolu hodi komprova ema ne’e se lae veteranu ne’e la falsu, maibé ema sira halo falsu problema maka la’ós veteranu,” José Ximenes hateten.

Notísia Relevante : MACLN identifika tan dokumentu veteranu falsu 3000-resin

José Ximenes dehan, iha prosesu inkéritu mós  Gabinete Kombate Korrupsaun iha Prokudór Jerál Repúblika identifika  ema lubun  iha  Komisaun Omenajen servisu hamutuk  ho pesoál  balun iha banku no Servisu Tékniku Administrasaun Eleitorál (STAE) falsifika kartaun eleitorál no konta tranzasaun osan.

Nia konsidera aktu ne’e  organizadu, no ema ne’ebé la’ós veteranu mak falsifika hodi hetan pensaun hanesan traisaun boot ba nasaun.

“Ida ne’e labele admite,” afirma Prokuradór Jerál Repúblika José Ximenes.

Nia hatutan, Estadu ne’e depende liu ba fundu petrolíferu, tanba ne’e, se mak falsifika dokumentu hodi hetan pensaun la tuir rekizitu  maka sei enfrenta prosesu krime no sei  reembolsa fila-fali osan ne’ebé durante  simu ona ba Estadu.

Notísia Relevante : Somotxo husu MACLN kontinua verifika dokumentu veteranu falsu

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here